Nanded News : नांदेड विभागातील साखर कारखान्यांनी उसाची पहिली उचल किमान तीन हजार रुपये द्यावी, अन्यथा साखर कारखान्यांच्या विरोधात सर्व शेतकऱ्यांना घेऊन आंदोलन उभारण्याचा इशारा ऊस दरनियंत्रण मंडळाचे माजी सदस्य तथा शिवसेना प्रणीत शेतकरी सेनेचे कार्याध्यक्ष प्रल्हाद इंगोले यांनी दिला आहे.

यंदाचा ऊस तोडणी हंगाम सुरू होऊन महिना झाला तरी अद्याप कोणत्याही कारखान्याने पहिली उचल दिली नाही. विभागात पहिली उचल किमान तीन हजार रुपये देण्याबाबत कारखान्यांना निर्देशित करावे असे निवेदन प्रल्हाद इंगोले यांनी राज्याचे साखर आयुक्त व नांदेड येथील प्रादेशिक सहसंचालक (साखर) सचिन रावल यांना दिले आहे.

केंद्राने २०२३ -२०२४ साठी १० टक्केच्या रिकव्हरीला प्रति टन तीन हजार चारशे रुपये दर जाहीर केला आहे. नांदेड विभागातील भाऊराव चव्हाण सहकारी साखर कारखाना, पूर्णा सहकारी साखर कारखान्यासह अन्य साखर कारखान्यांची अंतिम रिकव्हरी ही अकरा -बाराच्या दरम्यान आहे.

त्यामुळे पहिली उचल तीन हजार रुपये देणे सहज शक्य आहे. पश्चिम महाराष्ट्रात अनेक साखर कारखान्यांनी पहिली उचल साडेतीन हजार रुपये पर्यंत जाहीर केली आहे. नांदेड विभागातील साखर कारखाने मात्र उसाचा दर जाहीर न करता नियमांची पायमल्ली करत मनमानी पद्धतीने शेतकऱ्यांना कमी दर देतात.

त्यामुळे सर्व साखर कारखान्यांनी पहिली उचल किमान तीन हजार रुपये देण्यासाठी नांदेड जिल्ह्यातील सर्व पक्षीय शेतकऱ्यांना, समविचारी शेतकरी संघटनांना सोबत घेऊन सर्वपक्षीय आंदोलन छेडण्याचा इशारा प्रल्हाद इंगोले यांनी दिला आहे.