Nagar Market Committee Election Update : पारनेर तालुका कृषी उत्पन्न बाजार समितीची निवडणूक (Agriculture Produce Market Committee Election) जाहीर झाली. १८ जागांसाठी २७ मार्च रोजी अर्ज दाखल करण्यास प्रारंभ झाला. २८ एप्रिलला मतदान होत आहे. बाजार समिती निवडणूक जाहीर होताच तालुक्यातील राजकीय हालचालींना वेग वाढला.

सध्या बाजार समितीवर राष्ट्रवादीची सत्ता आहे. या निवडणुकीत राष्ट्रवादी काँग्रेस, भाजप तसेच शिवसेना (उद्धव बाळासाहेब ठाकरे गट) अशी तिहेरी लढतीची शक्यता आहे. प्रशासक येण्याआधी येथे राष्ट्रवादीची सत्ता होती.

पारनेर तालुका कृषी उत्पन्न बाजार समिती ही एकमेव सहकारी संस्था आर्थिकदृष्ट्या सक्षम आहे. पारनेर सहकारी साखर कारखाना विक्रीस गेला आहे, तर तालुका सहकारी दूध संघ, खरेदी-विक्री संघ हे फक्त नावापुरते अस्तित्वात आहेत.

सद्यःस्थितीत तालुका कृषी उत्पन्न बाजार समितीच सुस्थितीत आहे. २०२२-२३ या आर्थिक वर्षात २२७ कोटींची उलाढाल झाली होती व दोन कोटी २७ लाख रुपयांचा नफा झाला.

बाजार समितीच्या १८ जागांसाठी २३ मार्चपासून अर्ज दाखल करण्यास सुरुवात झाली आहे. त्यानंतर शिवसेना, राष्ट्रवादी काँग्रेस, तसेच भारतीय जनता पक्ष तयारीस लागले आहेत. त्यांनी आपापल्या कार्यकर्त्यांचे मेळावेही घेतले.

त्यामुळे आता यातील कोण कोणाशी युती करणार वा स्वतंत्र लढणार, हे मात्र काळच ठरविणार आहे. विद्यमान संचालक मंडळास एक वर्षाची मुदतवाढ मिळाली होती. एक नोव्हेंबरपासून बाजार समितीवर सहायक निबंधक गणेश औटी यांची प्रशासक म्हणून नेमणूक झाली.

आता निवडणूक होत असल्याने बाजार समितीवर पुन्हा एकदा लोकनियुक्त संचालक मंडळ अस्तित्वात येणार आहे. एकूण जागा १८ आहेत. कृषी, पतसंस्था व बहुउद्देशीय सहकारी सेवा संस्था ११, तर ग्रामपंचायत मतदारसंघ चार आहेत.