Parbbhani News : जिल्हा परिषदेच्या महिला व बाल विकास विभागअंतर्गत ग्रामीण भागातील अंगणवाडी मध्ये लेक लाडकी आणि पोषण टॅंकर मध्ये उत्कृष्ट कामगिरी बजावल्या बद्दल जिल्ह्यातील आदर्श अंगणवाडी सेविका, मदतनीस, पर्यवेक्षिका आणि बाल प्रकल्प विकास अधिकारी यांना शनिवारी (ता. २९) जिल्हा परिषदेच्या मुख्य कार्यकारी अधिकारी नतिशा माथुर यांच्या हस्ते पुरस्कारांचे वितरण करण्यात आले.

महिला व बाल विकास विभागाच्या उपमुख्य कार्यकारी अधिकारी रेखा काळम, जिल्हा महिला व बाल कल्याण अधिकारी कैलास तिडके, जल जीवन मिशनचे प्रकल्प संचालक शिवराज केंद्रे, अंगणवाडी महासंघाचे जिल्हाध्यक्ष बाबाराव आवरगंड, आयटकचे मुगाची बुरूड, सर्व तालुक्याचे बाल प्रकल्प विकास अधिकारी, पर्यवेक्षिका, अंगणवाडी सेविका, मदतनीस आदीची उपस्थिती होती.

यावेळी शासनाच्या मिशन शंभर दिवस, लेक लाडकी आणि पोषण टॅंकर या योजनांची प्रभावीपणे अंमलबजावणी करून उत्कृष्ट कार्य केल्या बद्दल मानवत तालुक्याच्या बाल प्रकल्प विकास अधिकारी बबिता तुकाराम मुंढे, सेलू तालुक्याचे बाल प्रकल्प विकास अधिकारी भाऊसाहेब भुजंगराव खरात यांचा आदर्श बाल विकास प्रकल्प अधिकारी म्हणून माथुर यांच्या हस्ते गौरव करण्यात आला.

आदर्श पर्यवेक्षिका पुरस्कार ः संगीता बळिराम सोरेकर (बीट-१ रामेटाकळी, ता. मानवत), रोहिणी वासुदेव डांगे (बीट-२ पिंगळी, ता. परभणी), रत्नमाला ज्ञानोबा बेले (बीट-२ जांब, ता. परभणी) यांना तर परभणी -१, परभणी -२, जिंतूर -१, जिंतूर-२, पूर्णा, पालम, गंगाखेड, सोनपेठ, पाथरी, मानवत, सेलू या तालुक्यातील कर्मचाऱ्यांना आदर्श अंगणवाडी सेविका, आदर्श मदतनीस म्हणून पुरस्कार देण्यात आले.

सेलू तालुक्यातील २१ अंगणवाडी सेविका व मदतनीस यांना नवनियुक्तीच्या आदेशाचे वितरण नतिशा माथुर यांच्या हस्ते करण्यात आले. प्रस्ताविक काळम यांनी केले सूत्रसंचालन प्रणिता देशपांडे, संवाद तज्ञ ज्ञानेश्वर गायकवाड यांनी केले तर आभार नारायण शिंदे यांनी मानले.