Jalgaon News: खानदेशात हंगामातील पपईची लागवड सुरू आहे. यंदा क्षेत्र वाढेल, असे संकेत असून, पपई रोपांचे दरही वाढले आहेत. पपईदर टिकून असल्याने अनेकांची पपईस पसंती आहे.

खानदेशात पपईसाठी नंदुरबार जिल्हा आघाडीवर असून, २०२३-२४ मध्ये जिल्ह्यात पाच हजार २०० हेक्टरवर पपईची लागवड झाली होती. नंदुरबारातील शहादा तालुक्यातील लागवड साडेचार हजार हेक्टरवर झाली होती. जळगाव जिल्ह्यात सुमारे १२०० हेक्टर आणि धुळ्यातही सुमारे एक हजार हेक्टरवर लागवड झाली होती.

खानदेशात ७८६ व १५ नंबर पपई वाणांची लागवड केली जाते. त्यात ७८६ वाणांवर रोग वाढत असल्याने गत हंगामात १५ नंबर वाणाच्या लागवडीला अनेकांनी पसंती दिली. परंतु कमी पाऊस व नैसर्गिक समस्यांमुळे पपईचे उत्पादन मागील वेळेस कमी आले. मागील वेळेस रोपांची टंचाई होती. यामुळे अनेक शेतकरी वेळेत पपईची लागवड करू शकले नाहीत. यामुळे उत्पादन डिसेंबरमध्ये सुरू झाले. दरही कमी मिळाले.

यंदा मात्र पपईचे दर स्थिर आहेत. सध्या प्रतिकिलो १७ रुपये दर जागेवर मिळत आहे. यंदाच्या हंगामात ऑक्टोबरमध्ये सरासरी ३५ रुपये प्रतिकिलो, नोव्हेंबरमध्ये सरासरी २० ते २३ रुपये प्रतिकिलो आणि डिसेंबरमध्ये सरासरी १० प्रतिकिलोचा दर पपईला शेतकऱ्यांना जागेवर मिळाला. दरात मोठी पडझड झाली नाही. पपई पिकात नफा काहींना बरा राहिला. ही समस्या लक्षात घेऊन अनेकांनी पपई पिकास पसंती दिली आहे. २०२४-२५ मध्ये लागवडीबाबत प्रतिसाद आहे. पपई रोपे दरही वाढले आहेत.

परंपरेनुसार नंदुरबारातील शहादा, तळोदा, जळगावातील चोपडा, यावल, जामनेर भागांत आगाप लागवड डिसेंबरपर्यंत झाली आहे. धुळ्यातील शिरपुरातही काही शेतकरी पपईची लागवड करीत आहेत. पुढे उष्णता सुरू होईल. त्यापूर्वी पीक बऱ्यापैकी स्थिर होऊन वाढीस लागावे व पुढे चांगले दर मिळावेत, असेही नियोजन आगाप लागवडीमागे आहे. यातच पपई लागवड खानदेशात यंदा सुमारे एक ते दीड हजार हेक्टरने वाढेल, अशी स्थिती आहे.