Pandhar News : पंढरपूर येथील श्री विठ्ठल रुक्मिणी मंदिर परिसरात राबवण्यात येणाऱ्या कॉरिडॉरबाबत राज्य सरकार सकारात्मक आहे. मात्र स्थानिक लोकांना विश्वासात घेऊन कॉरिडॉरचे काम केले जाईल, असे आश्वासन आमदार समाधान आवताडे यांनी स्थानिक दुकानदार आणि व्यापाऱ्यांच्या बैठकीत दिले.

येथील श्री विठ्ठल मंदिर परिसरातील भाविकांची होणारी गर्दी विचारात घेऊन परिसरात कॉरिडॉर (विकास आराखडा) तयार करण्याचा शासन स्तरावर विचार सुरू आहे. अलीकडेच मुख्यमंत्री देवेंद्र फडणवीस आणि अर्थमंत्री निर्मला सीतारामन यांनीही कॉरिडॉरबाबत सकारात्मक भूमिका मांडली आहे. मंदिर परिसरातील काही स्थानिक दुकानदारांनी मंदिर परिसरातील कॉरिडॉरला विरोध सुरू केला आहे.

या पार्श्वभूमीवर मंदिर परिसरातील दुकानदारांची भूमिका जाणून घेण्यासाठी आमदार आवताडे यांच्या उपस्थितीमध्ये गुरुवारी (ता.१३) येथील शासकीय विश्रामगृहावर बैठक झाली. त्या बैठकीमध्ये आमदार समाधान आवताडे यांनी स्थानिक दुकानदारांवर अन्याय होऊ देणार नाही, असे आश्वासन दिले.

आमदार आवताडे म्हणाले, पंढरपूर शहराच्या विकासासाठी सरकार कॉरिडॉर राबविण्यावर ठाम आहे. कॉरिडॉरचे काम सुरू करण्यापूर्वी मंदिर परिसरातील दुकानदारांची मते आजमावणे माझे पहिले कर्तव्य आहे. चुकीच्या पद्धतीने कोणावरही अन्याय होऊ देणार नाही. विधानसभेत कॉरिडॉर संदर्भात चर्चा झाली तर त्यामध्ये स्थानिक दुकानदार आणि रहिवाशांचे प्रश्न प्राधान्याने मांडणार आहे.

येथील लोकांना वारवर सोडणार नाही. प्रशासनाकडून अजून कोणताही आराखडा आलेला नाही. परंतु जे इथल्या लोकांचे मत आहे, तेच माझे देखील मत आहे. परंतु कॅारिडॉरला विरोध आहे, असा याचा अर्थ नाही.

कॉरिडॉर करताना कोणालाही त्रास होणार नाही, अशा पद्धतीने तो करावा. माध्यमांनी देखील कॉरिडॉरला पंढरपूरकरांचा विरोध आहे, अशी आवई उठवू नये. पंढरपूर शहराच्या विकासाला चालना देणाऱ्या कोणत्याही प्रकल्पाला किंवा योजनेला विरोध न करता पाठिंबा द्यावा, असे आवाहन आमदार आवताडे यांनी केले आहे.