Sangli News : शिराळा तालुक्यात ३२ टक्के खरिपाच्या पेरण्या झाल्या आहेत. भात पेरणी ३२.२५, तर एकूण खरीप पेरणी ३१.५६ टक्के झाली. आता होणारी भात पेरणी केवळ रोप लावणीवर अवलंबून आहे.

तालुक्यात चार दिवसांपासून पावसाने उघडीप दिल्याने ओढ्याकाठी अथवा ओघळीच्या पाण्यावर सायपन पद्धत अथवा डिझेल इंजिनद्वारे कोरड्या शेतात पाणी सोडून रोप लावणीची कामे पश्चिम भागात सुरू आहेत. जेथे पाण्याची सोय नाही, अशा ठिकाणी रोपं लावण्याची कामे खोळंबली आहेत.

काही ठिकाणी रोपांचा तुटवडा भासू लागल्याने वाळवा तालुक्यातील काही गावांतून रोपे आणून लावण केली जात आहे. यावर्षी १२ मेपासून मॉन्सूनपूर्व पावसाने हजेरी लावली. ८० टक्के धूळवाफ पेरण्या झाल्याच नाहीत. मे आणि जूनमध्ये पाऊस सुरू राहिल्याने रोप लावणीसाठी तरवे टाकता आले नाही.

तरवे टाकले त्यांच्या शेतात पाणी साचून राहिल्याने कुजले. त्यांना दुबार पेरणी करण्याची वेळ आली. ज्या ठिकाणी धूळवाफ पेरण्या झाल्या नाहीत, त्या ठिकाणी रोप लावण करावी लागणार आहे. त्यासाठी रोपे उपलब्ध झाली नाहीत.

आता रोपे उपलब्ध झाली आहेत. पाऊस नसल्याने चिखल करणारे शक्य नाही. ज्या शेताजवळ ओढ्या-ओघळीचे पाणी आहे, अशा ठिकाणी डिझेल इंजिनच्या माध्यमातून शेतात पाणी सोडून रोपे लावली जात आहेत.

ज्या ठिकाणी पाणी उपलब्ध होत नाही, त्या शेतकऱ्यांना मोठ्या पावसाची प्रतीक्षा लागली आहे. तालुक्यात चार दिवसांपासून पावसाने उघडीप दिली आहे. कोळपणी, भांगलणीला गती आली आहे. पावसाचा जोर कमी झाल्याने पाणी साचले नसल्याने रोप लावण खोळंबली आहेत.