Dhule News : पढावद (ता. शिंदखेडा) येथील कृषिभूषण ॲड. प्रकाश पाटील यांची गटशेती, जय खानदेश कृषी प्रोड्यूसर कंपनी व कृषिभूषण सीडची कृषी अधिकाऱ्‍यांनी पाहणी केली. शेतकऱ्‍यांसाठीचे विविध प्रयोग प्रेरणादायी असल्याचे सांगूत गटशेतीचे अधिकाऱ्यांनी कौतुक केले.

या वेळी जिल्हा अधीक्षक कृषी अधिकारी सूरज जगताप, उपसंचालक प्रज्ञा पवार, कृषी अधिकारी साबळे, तालुका कृषी अधिकारी नागरे यांच्यासह कृषी विभागाचे विविध अधिकारी उपस्थित होते.

या पाहणीत सामुदायिक शेततळे (सव्वा कोटी लिटर क्षमता), तापी नदीच्या सुलवाडे बॅरेजमधून सहा किलोमीटरवरुन उपसा सिंचन योजना, ठिबक स्वयंचलित यंत्रणा व निर्यातक्षम केळीची पाहणी केली.

जय खानदेश कृषी प्रोड्यूसर कंपनीच्या दादर (परभणी सुपर मोती) या मुलभूत बियाण्यापासून पायाभूत बियाण्याचे बिजोत्पादन प्लॉट, पीकेव्ही दोन बिजोत्पादनाच्या प्लॉटची पाहणी करण्यात आली.

जय खानदेश कृषी प्रोड्यूसर कंपनीच्या बियाणे प्रक्रिया केंद्राची त्यांनी माहिती घेतली. यावर्षी कंपनीने एक हजार ८०० ते एक हजार ९०० क्विंटल दादरचे प्रमाणित बियाणे व पाचशे क्विंटल हरभरा बियाणे तयार करणार असल्याची माहिती कृषीभूषण अॅड. पाटील यांनी दिली. या वेळी शरद निकम, आनंद ठाकरे, मदन परदेशी, योगराज पाटील, आधार ठाकरे, रवींद्र माळी, विलास ठाकरे आदी शेतकरी उपस्थित होते.