Pune News : सोयाबीन, मूग, उडदाच्या हमीभावाने होणाऱ्या खरेदीला राज्य सरकारने मुदत वाढ दिली आहे. मुख्यमंत्री देवेंद्र फडणवीस यांनी याबाबतचे आदेश दिले असून राज्यातील शेतकऱ्यांनी मागणी केली होती. तसेच याचमुद्द्यावरून राज्य कृषी मुल्य आयोगाचे अध्यक्ष पाशा पटले यांनी देखील मुख्यमंत्र्यांची भेट घेऊन मुदत वाढ देण्याची मागणी केली होती. आता सोयाबीन, मूग, उडीद हमीभाव खरेदी ऑनलाईन नोंदणीस ३१ डिसेंबर, २०२४ पर्यंत मुदत वाढ देण्यात आली आहे.

राज्यात विधानसभा निवडणुकीच्या कालावधीत हमीभावाने शेतमाल खरेदीचा मुद्द्या चांगलाच गाजला होता. तर प्रचारादरम्यान भाजपसह सर्वच पक्षांनी आमचे सरकार आल्यास शेतमालाची खरेदी हमीभावाने केली जाईल, असे आस्वासन दिले होते. तर पंतप्रधान नरेंद्र मोदी यांनी देखील हमीभाव वाढून देण्याची घोषणा करताना १२ टक्के ऐवजी १५ टक्के ओलावा असणारे सोयाबीन खरेदी केले जाईल, अशी ग्वाही दिली होती. आता याचा केंद्रात निर्णय झाला आहे. मात्र राज्यात निर्णयाची अंमलबजावणी झालेली नाही. ज्याचा फटका राज्यातील सोयाबीन उत्पादकांना बसत आहे.

दरम्यान यावरून दोनच दिवसांपूर्वी राज्य कृषी मुल्य आयोगाचे अध्यक्ष पाशा पटले यांनी मुख्यमंत्र्यांची भेट घेऊन ओलाव्याचा मुद्दा मांडला होता. तसेच शेतकऱ्यांच्या रोषाबद्दल माहिती दिली होती. यानंतर आता राज्याच्या पणन आणि सरकार विभागाने गुरूवारी याबाबत आदेश काढले आहेत. याबाबतचे आदेश सहकार विभागाच्या अपर सचिव संगीता शेळके यांनी निर्गमित केला आहे.

पणन आणि सरकार विभागाने आदेश काढताना याआधी सोयाबीन, मूग, उडीद हमीभाव खरेदी ऑनलाईन नोंदणीस १५ डिसेंबर, २०२४ पर्यंत मुदत वाढ देण्यात आली आहे. ती मुदत आता ३१ डिसेंबर, २०२४ पर्यंत वाढवण्यात येत आहे. यामुळे राज्यातील संबंधित संस्थांनी सोयाबीन, मूग, उडीद हमीभाव खरेदी ऑनलाईन नोंदणी ३१ डिसेंबर चालू ठेवावी आणि खेरदी करावी, असे आदेश देण्यात आले आहेत.

दरम्यान बीड जिल्ह्यातील बीड तालुक्यात २ पेक्षा अधिक सोयाबीन हमीभाव केंद्र असून या केंद्रावर शेतकऱ्यांकडून मोठ्या प्रमाणात हमीभावाने सोयाबीन विक्री होत आहे. कालच विक्री मर्यादा वाढविण्यात आलेली असून आता हेक्टरी २१.५ क्विंटल पर्यंत सोयाबीन विक्री खरेदी केंद्रावर करता येणार आहे. त्यामुळे ज्या शेतकऱ्यांनी अद्याप ऑनलाईन नोंदणी केलेली नाही त्यांनी आता ३१ डिसेंबर पर्यंत नोंदणी करावी. तसेच सोयाबीन, मूग, उडीद हमीभाव खरेदी केंद्रावरच विक्री करावी, असे आवाहन बीड कृषी उत्पन्न बाजार समितीचे संचालक धनंजय गुंदेकर यांनी केले आहे.