Solapur News : शेतकऱ्यांना स्वतःच्या पायावर उभे राहण्यासाठी बँकांनी पीककर्जाचा पुरवठा करुन शेतकऱ्यांना मदत करावी, त्यासाठी बँकांनी एक शाखा, एक गाव, या पद्धतीने पालकत्व घेऊन हे काम करावे, असे आवाहन आमदार सुभाष देशमुख यांनी अधिकाऱ्यांना सूचना दिल्या.

दक्षिण सोलापूर तालुका खरीप पीककर्ज वाटप आढावा बैठकीत आमदार देशमुख हे बोलत होते. सहाय्यक निबंधक, सहकारी संस्था, दक्षिण सोलापूर दत्तात्रय मोरे, अग्रणी बँकेचे व्यवस्थापक राम वारकडे, कृषी विभागाचे प्रतिनिधी व तालुक्यातील सर्व बँक शाखाधिकारी उपस्थितीत होते.

आमदार देशमुख म्हणाले, बँकांनी त्यांना दिलेले उद्दिष्टे पूर्ण करावे. शेतकऱ्यांची अडवणूक करू नका. बँका आणि शेतकरी यांचा समन्वय असावा. शेतकऱ्यांना गरज असेल, त्यावेळी तात्काळ मदत करा, शेतकरी स्वतःच्या पायावर उभा राहिला पाहिजे, ही भूमिका घ्या. नियमित कर्ज भरणा करणाऱ्या शेतकऱ्यांचा सन्मान करा व त्यांना प्रोत्साहन द्या.

सर्व बँकानी शेतकरी मेळावे घेऊन जनजागृती करावी. बँकाच्या परिसरात ग्राहकांना सोईसुविधा द्या. शासनाच्या योजना आपल्या बँका मार्फत राबविल्या जातात. त्याची अंमलबजावणी चांगल्या पद्धतीने करा.

बँकांनी विकासाचा केंद्रबिंदू बनून काम करावे. एक गाव, एक बँक या पद्धतीने शेतकऱ्यांना सहकार्य करावे. बचत गटांच्या महिलांना अर्थसाहाय्य करावे व त्यांना उद्योजक करावे. त्यामुळे शेतकऱ्यांचा बँकेवर चा विश्वास वाढेल, असेही ते म्हणाले.

सप्टेंबरमध्ये पर्यटन सप्ताह

जिल्ह्यात पर्यटन सप्ताह साजरा करण्याचा मानस यावेळी आमदार देशमुख यांनी व्यक्त केला. तसेच २७ सप्टेंबर ते २ ऑक्टोबर २०२५ या कालावधीमध्ये जिल्ह्यात यानिमित्ताने विविध उपक्रम राबवण्यात येणार आहेत. त्यादृष्टीने सर्वांनी सहकार्य करावे, असे आवाहनही त्यांनी केले.