Jalgaon News : जळगाव जिल्ह्यातील भेंडीचे आगार अशी ओळख असलेल्या एरंडोल, धरणगाव भागांत भेंडीचे क्षेत्र कमी झाले आहे. उष्णतेमुळे अनेकांनी लागवड टाळली आहे. एरंडोलमधील खर्ची, खेडी, कढोली, धारागीर, एरंडोल, कासोदा, जवखेडा, उत्राण, तळई आदी भागांत भेंडी पीक असते.

तसेच धरणगावमधील पथराड, चोरगाव, चांदसर, दोनगाव, पाळधी, रेल, लाडली, भोकणी, फुलपाट, आव्हाणी व इतर भागांत भेंडी पीक बारमाही घेतले जाते. पावसाळ्यातही या भागात भेंडी असते. तसेच अनेक जण मार्चमध्ये लागवड करतात. परंतु मार्च व एप्रिलमधील लागवड घटली आहे. भेंडीची लागवड कमी झाली आहे.

ज्या भागात लागवड झाली आहे, त्यातून पुढील महिन्यात किंवा ३० ते २३ दिवसांनंतर भेंडीची काढणी सुरू होईल. यामुळे सध्या भेंडीची बाजारातील आवक कमी झाली आहे. या भागातील ज्या शेतकऱ्यांची भेंडी काढणीवर आहे, त्यांना थेट जागेवर किंवा शिवार खरेदीत २० ते २५ रुपये प्रतिकिलोचा दर मिळत आहे.

कमी दर्जाच्या किंवा दुय्यम दर्जाच्या भेंडीसही २० रुपये प्रतिकिलोचा दर आहे. या गावांत एरंडोल, धरणगाव भागातील मोठे खरेदीदार, एजंट भेंडीची खरेदी करीत आहेत. या भेंडीची पाठवणूक मुंबई, ठाणे, मध्य प्रदेशातील इंदूर, गुजरातमधील सुरत, बडोदा येथे केली जात आहे. यामुळे स्थानिक बाजारात भेंडीची आवक कमी आहे. जळगाव इतर शहरांमधील आठवडी व इतर बाजारांत विक्रेते भेंडीची ५० ते ६० रुपये प्रतिकिलो या दरात विक्री करीत आहेत.

जळगाव येथील भाजीपाल्याचा बाजार प्रसिद्ध आहे. या बाजारात औरंगाबादमधील सोयगाव, सिल्लोडसह धरणगाव, एरंडोल, चोपडा, यावल आदी भागातूनही भाजीपाल्याची आवक होते. परंतु सध्या भेंडीची आवक निम्म्यावर किंवा त्यापेक्षा कमी आहे. डिसेंबरमध्ये भेंडीची जळगावच्या बाजारात प्रतिदिन सरासरी १७ क्विंटल आवक झाली होती.

या महिन्यात मागील आठ दिवसांत ही आवक प्रतिदिन सरासरी ८ क्विंटल एवढीच आहे. यात बुधवारी, गुरुवारीही आवक यापेक्षा कमी राहिल्याची नोंद झाली आहे. भेंडीला ऑक्टोबर, नोव्हेंबर व डिसेंबरमध्ये बाजारात प्रतिकिलो १५ ते २० रुपये दर शेतकऱ्यांना मिळाला होता. उन्हाळ्यात दर १५ रुपयांपासून २५ रुपयांपर्यंत मिळाले. मार्चमध्ये अनेक शेतकऱ्यांनी भेंडीचे क्षेत्र रिकामे केले पण पुन्हा भेंडी लागवड केली नाही. यामुळे हे क्षेत्र घटले आहे. पुढे जुलैत किंवा या महिन्याच्या मध्यात लागवड सुरू होईल, असे चित्र आहे.