Sangli News: बदलत्या वातावरणाचा फटका डाळिंब पिकालाही बसला आहे. यामुळे डाळिंबावर तेलकट डाग आणि कुजवा रोगाचा १० टक्के प्रादुर्भाव झाला आहे. पीक वाचविण्यासाठी शेतकरी धडपड करू लागला आहे. मात्र वातावरणातील बदलामुळे रोगाचा प्रादुर्भाव कमी होण्यास अडथळे येवू लागले आहेत. त्यामुळे खर्चही वाढला असल्याने डाळिंब नैसर्गिक संकटाच्या कचाट्यात सापडला आहे.

राज्यात आंबिया बहर ३० ते ३५ हजार हेक्टरवर शेतकऱ्यांनी धरला आहे. त्यापैकी ५० टक्के बागांचे नुकसान झाल्याचा अंदाज शेतकऱ्यांनी व्यक्त केला आहे. त्यातूनही काही शेतकऱ्यांनी बागा साधल्या. गेल्या काही दिवसांपासून पावसाने उसंत घेतली आहे. त्यामुळे काहीसा दिलासा मिळाला.

सद्यःस्थितीला डाळिंब १५० ते २०० ग्रॅमहून अधिक वजनाचे आहे. मॉन्सूनपूर्व पावसामुळे अगोदरच पीक संकटात सापडले असतानाच अधूनमधून जोरदार पाऊस पडत आहे. कधी कडक उन्ह, कधी ढगाळ वातावरण, हवामानातील बदल या साऱ्याचा परिणाम पुन्हा डाळिंबावर होऊ लागला आहे. यामुळे तेलकट डाग आणि कुजवा रोगाचा प्रादुर्भाव होण्यास सुरुवात झाली आहे. गेल्या आठवड्याभरात जवळपास १० टक्के या दोन्ही रोगाचा प्रादुर्भाव झाला असल्याचे डाळिंब संघाने सांगितले आहे.

सध्या तेलकट आणि कुजवा रोगाचे प्रमाण कमी आहे. त्यामुळे रोगाचा प्रादुर्भाव कमी करण्यासाठी शेतकऱ्यांनी फवारणीचे नियोजन केले आहे. परंतु वातावरण असेच राहिल्यास रोगाचा प्रादुर्भाव वाढेल अशी भीती शेतकऱ्यांमध्ये आहे. परिणामी, एकरी १० ते १५ टक्के खर्च वाढला आहे. एकंदर नैसर्गिक संकटामुळे उत्पादनात २० टक्के घट होईल, असा प्राथमिक अंदाज डाळिंब संघाने व्यक्त केला आहे.

मृग बहरही धोक्यात

राज्यात सर्वसाधारणपणे ५० हजार हेक्टरवर मृग बहर धरला जातो. यंदा अंदाजे १५ टक्के क्षेत्रावर आगाप मृग बहर धरला आहे. बहुतांश भागातील डाळिंबाच्या बागा कळी अवस्थेत तर काही बागा फुलोरावस्थेत आल्या आहेत. परंतु बदलत्या वातावरणाचा फटका मृग बहरातील डाळिंबालाही बसला आहे. त्यामुळे मृग बहर देखील काही अंशी धोक्यात आला असल्याचे शेतकऱ्यांनी सांगितले.