Akola News : अकोला ः शेतकऱ्यांसाठी कृषी विभागाच्या विविध योजना, उपक्रम, कृषी मार्गदर्शन याविषयक माहिती शेतकऱ्यांना मिळण्यासाठी अकोला जिल्हा अधीक्षक कृषी अधिकारी कार्यालयातर्फे व्हॉटसअॅप चॅनेल सुरू करण्यात आले आहे. या चॅनेलचे उद्‌घाटन जिल्हाधिकारी अजित कुंभार यांच्याहस्ते झाले.

या वेळी जिल्हा अधीक्षक कृषी अधिकारी शंकर किरवे उपस्थित होते.
समाज माध्यमांचा वापर सध्या सर्वत्र केल्या जातो. शेतकऱ्यांपर्यंत कृषी विभाग, शासनाच्या योजना, उपक्रम, कृषी मार्गदर्शन याबाबतचे संदेश पोहोचविण्यासाठी हे चॅनेल उपयुक्त ठरेल,

असा विश्वास जिल्हाधिकारी श्री. कुंभार यांनी व्यक्त केला. कृषी विभागाने हा नावीन्यपूर्ण उपक्रम हातात घेतला आहे. याचा निश्‍चितच शेतकऱ्यांना येत्या काळात चांगला फायदा होईल. शेतकऱ्यांना योजनांची, उपक्रमांची माहिती मिळू शकेल, असा आशावादही या वेळी व्यक्त करण्यात आला.

-जिल्ह्यातील शेतकऱ्यांना या चॅनेलच्या माध्यमातून तत्काळ माहिती उपलब्ध होऊ शकेल. आज प्रत्येक घरात व्हॉटसॲपचा वापर होत असतो. हे माध्यम माहिती पोचवण्यासाठी प्रभावी ठरेल.
-शंकर किरवे,
जिल्हा अधीक्षक कृषी अधिकारी, अकोला.