Thackeray VS Shinde : राष्ट्रवादीत फूट पाडल्यानंतर मुख्यमत्री एकनाथ शिंदे आणि उपमुख्यमंत्री देवेंद्र फडणवीस यांनी शिवसेना (ठाकरे) गटाला पुन्हा एकदा मोठा धक्का दिले आहे. विधानसभेतील शिवसेनेच्या अनेक आमदारांनी एकनाथ शिंदे यांना पाठिंबा दिला होता. मात्र, विधानपरिषदेतील आमदार ठाकरेंसोबत होते. परंतु काही दिवसांपूर्वी आमदार मनिषा कायंदे यांनी पाठिंबा दिल्यानंतर आता शिवसेनेत विधान परिषद उपसभापती नीलम गोऱ्हे यांनी प्रवेश केला आहे.

मुख्यमंत्री एकनाथ शिंदे यांच्या नेतृत्वात शिवसेनेत प्रवेश केला. यावेळी उपमुख्यमंत्री देवेंद्र फडणवीस, मंत्री गिरीश महाजन, उदय सामंत उपस्थित होते. आता नीलम गोऱ्हे यांनी शिंदेंना पाठिंबा दिल्यामुळे विधान परिषदेतील ठाकरे गटाचे संख्याबळ कमी झाले आहे.

कोण आहेत नीलम गोऱ्हे?

नीलम गोल्हे या ठाकरे गटाच्या महत्वाच्या नेत्या आहेत. स्त्री आधार केंद्र आणि क्रांतिकारी महिला संघटनेच्या माध्यमातून त्या सामाजिक कार्यही करतात. महिलांच्या प्रश्नी त्या कायम तत्पर असतात. पंचायत राज, महिला विकास, स्त्रियांवर होणारे अत्याचार यावर त्या काम करतात.

त्यांच्याकडे अनेक वर्षांपासून शिवसेनेचे उपनेत्याही आहेत. पक्षाची राजकीय भूमिका आजपर्यंत त्या जनतेसमोर मांडत आल्या आहेत. शिवसेनेच्या कोट्यातून २००२ पासून आतापर्यंत विधान परिषदेत संधी मिळाली. सध्या त्या विधान परिषदेच्या उपसभापती नीलम गोऱ्हे पदावर कार्यरत आहेत.

उद्धव ठाकरे यांच्या नेतृत्वाखाली महाविकास आघाडी सरकारच्या विरोधात एकनाथ शिंदे यांनी बंड केले. त्यांना शिवसेनेच्या ४० आमदारांनी पाठिंबा दिला होता. विधान परिषदेतील विप्लव बाजोरिया वगळता इतर आमदार ठाकरेंसोबत होते.

दरम्यान, सुषमा अंधारे यांच्या पक्षप्रवेशानंतर ठाकरे गटातील महिला आघाडीत धुसफूस सुरू झाली. सुषमा अंधारेंना दिले जाणारे महत्त्व अनेकांच्या नाराजीचे कारण बनले. त्यामुळे काही दिवसांपूर्वी मनिषा कायंदे यांनी शिंदेंच्या शिवसेनेत प्रवेश केला. त्यानंतर आता नीलम गोऱ्हे यांनी ठाकरेंची साथ सोडल्याने विधान परिषदेतील ठाकरे गटाचे संख्याबळ कमी झाले. त्यामुळे आता विधान परिषदेतही विरोधी पक्षनेतेपद गमावण्याची वेळ उद्धव ठाकरे गटावर आली आहे.