Nagpur News : सजावटीसह धार्मिक तसेच इतर कामातही फुलांचा वापर वाढला आहे. त्यामुळे फुलांच्या मागणीतही वाढ नोंदविण्यात आली आहे. हा विस्तारित बाजार लक्षात घेता शेतकऱ्यांनी फूलपिकांच्या लागवडीवर भर दिला पाहिजे. त्याकरिता सामूहिक शेतीचा पॅटर्न राबवावा त्यासोबतच बाजारात मागणी असलेल्या फुलांच्या लागवडीसाठी पुढाकार घ्यावा, असे आवाहन विभागीय कृषी सहसंचालक शंकर तोटावार यांनी केले.

महाराष्ट्र ॲग्री बिझनेस नेटवर्क (मॅग्नेट) प्रकल्पांतर्गंत महाराष्ट्र सहकार विकास महामंडळ पुणे व प्रकल्प संचालक आत्मा यांच्या संयुक्‍त सहकार्याने फूलपिके-उत्तम कृषी कार्यपद्धती या विषयावर एक दिवसीय कार्यशाळेचे आयोजन करण्यात आले होते. कार्यशाळेचे उद्घाटक म्हणून श्री. तोटावार बोलत होते.

मॅग्नेट नागपूरचे प्रकल्प उपसंचालक अजय कडू, आत्मा प्रकल्प संचालक डॉ. अर्चना कडू, जिल्हा अधिक्षक कृषी अधिकारी रवींद्र मनोहरे, उपसंचालक पल्लवी तलमले, वरिष्ठ प्रशिक्षण अधिकारी हेमंत जगताप यांची या वेळी उपस्थिती होती. शंकर तोटावार यांनी अशा कार्यशाळांमधून संबंधित पिकाविषयीची तांत्रिक माहिती मिळते. त्यामुळे शेतकऱ्यांनी बाजारपेठेसह तंत्रज्ञान माहिती व्हावे याकरिता अशा कार्यशाळांमध्ये सहभाग वाढवावा, अशी अपेक्षा व्यक्‍त केली.

अजय कडू यांनी नागपूर जिल्ह्यात फूलशेतीला वाव असल्याचे सांगत क्‍लस्टर बेस याप्रमाणे त्यासाठी पुढे आले पाहिजे, असे सांगितले. रवींद्र मनोहरे यांनी देखील या वेळी मार्गदर्शन केले. मॅग्नेटचे ओमप्रकाश सुखदेवे, सुमेध कांबळे, दीपक बेदरकर यांच्यासह डॉ. पंजाबराव देशमुख कृषी विद्यापीठाच्या पुष्पशास्त्र विभागाचे डॉ. नितीन गुप्ता यांनी ही या वेळी शेतकऱ्यांना लागवड ते काढणी आणि बाजारपेठ या विषयावर तांत्रिक माहिती दिली.

फूलशेती करण्यास इच्छुक शेतकऱ्यांना बाजारपेठेबाबत माहिती व्हावी याकरिता महात्मा फुले पुष्प उत्पादक असोसिएशनचे अध्यक्ष जयंत नरनवरे, मनोहर वानखेडे, नारायण सातपुते, मंगेश खवसे यांनी माहिती दिली. हेमंत जगताप यांनी सहकार विकास महामंडळाला नागपूर विभागामध्ये फूलपीक प्रशिक्षण घेण्यासाठी संधी उपलब्ध करून दिल्याबद्दल आभार मानले.

येत्या काळात सहकार विकास महामंडळामार्फत विविध कार्यशाळांचे आयोजन नागपुरात होईल, असा विश्‍वासही व्यक्‍त केला. कार्यशाळेला २५० पेक्षा अधिक शेतकऱ्यांनी सहभाग नोंदविला होता. सूत्रसंचालन हेमंत जगताप यांनी केले.