Nanded News : सेंद्रिय शेतीला बाजारपेठ मिळवून देण्यासाठी स्वतः पुढाकार घेऊ, तुम्ही केवळ सेंद्रिय शेतीचे प्रमाणीकरण करा, नैसर्गिक सेंद्रिय शेतीतून तयार होणाऱ्या उत्पादनांना दुप्पट दर मिळवून देण्याची जबाबदारी माझी राहील, असे जिल्हा परिषदेच्या मुख्यकार्यकारी अधिकारी श्रीमती मेघना कावली यांनी सांगितले.

लोहा तालुक्यातील सायाळ येथील परंपरागत कृषी विकास योजनेअंतर्गत सेंद्रिय शेती करणाऱ्या महिला शेतकरी गटांच्या शिष्टमंडळाने मंगळवारी (ता. १५) नांदेड जिल्हा परिषदेच्या मुख्य कार्यकारी अधिकारी श्रीमती मेघना कावली यांची भेट घेतली. यावेळी सेंद्रिय पद्धतीने शेती करणाऱ्या ६० गटाचे सचिव, अध्यक्ष तसेच शेतकरी गटांचे प्रतिनिधी उपस्थित होते.

बैठकीत सूक्ष्म प्रक्रिया उद्योग सुरू करण्यासंबंधी योजनांवर देखील चर्चा झाली. जिल्हा परिषदेमार्फत महिला शेतकरी गटांना या उद्योगासाठी प्रोत्साहन दिले जाणार असल्याचे सांगण्यात आले.

महिला गटांनी आपल्या शेतीतून विविध उत्पादनांची प्रक्रिया करून त्यांना मूल्यवर्धन करण्याचा संकल्प व्यक्त केला. याशिवाय, त्या स्वतः शेतकऱ्यांच्या सेंद्रिय शेतीला भेट देणार असल्याचेही सांगितले. या महत्त्वपूर्ण संवादामुळे लोहा तालुक्यातील सेंद्रिय शेतीला बळकटी मिळेल आणि शेतकऱ्यांना त्याचा प्रत्यक्ष फायदा होईल, असा विश्वास उपस्थितांनी व्यक्त केला.

बैठकीत सेंद्रिय शेतीच्या विकासासाठी विविध मुद्द्यांवर सखोल चर्चा करण्यात आली. या बैठकीस जिल्हा परिषदेच्या कृषी विभागाचे मोहीम अधिकारी सचिन कपाळे, कृषी अधिकारी निरडे, युवा शेतकरी रत्नाकर ढगे, गणपत जामगे, महादेव पाटील ढगे, ओमकार भालके, ज्ञानेश्वर येवले, मनोज जाधव यांच्यासह पिंपळगाव, पारडी, पोखरभोशी, हिंदोळा, सायाळ, जामगाव शिवणी येथील महिला शेतकरी गटांचे प्रतिनिधी उपस्थित होते.