Political Allegations: राज्याचे ग्रामविकास आणि पंचायतरायज मंत्री जयकुमार गोरे यांनी विरोधकांचे आरोप धुडकावून लावले आहेत. कोर्टाने निर्दोष मुक्तता केली आहे, मात्र विरोधक माझी बदनामी करत आहेत, असं गोरे यांनी आरोपांवर स्पष्टीकरण दिलं आहे. महिलेला नग्न फोटो पाठवून छळ केल्याचा आरोप संजय राऊत आणि कॉँग्रेस नेते विजय वडेट्टीवार यांनी गोरे यांच्यावर केला आहे. त्यामुळे राजकीय वर्तुळात जोरदार चर्चा सुरू आहे.

गोरे म्हणाले, "२०१९ कोर्टाने माझी निर्दोष मुक्तात केली आहे. निकालाची प्रत माझ्याकडे आहे. परंतु विरोधक माझी बदनामी करत आहे. त्यामुळे मी माझ्या बदनामीचा खटला दाखल करणार आहे. तसेच विधीमंडळात हक्कभंग प्रस्ताव आणणार आहे. जी कारवाई अपेक्षित ती करणार आहे," असा इशारा राज्याचे ग्रामविकास आणि पंचायतरायज मंत्री यांनी दिला आहे.

पुढे गोरे म्हणाले, "२०१७ साली माझ्याविरोधात एक गुन्हा दाखल झाला. माझ्या विधानसभेची निवडणूक झाली. त्यानंतर मसवड पालिकेची निवडणूक होती. त्याच्या पार्श्वभूमीवर माझ्यावर गुन्हा दाखल झाला. २०१९ साली या प्रकरणी निकाल लागला. निकालाची प्रत माझ्याकडे आहे. निकालामध्ये कोर्टाने मला निर्दोष मुक्त केलं आहे. जप्त केलेला मुद्देमाल आणि मोबाईल नष्ट करण्याचे आदेश न्यायालयाने नष्ट करण्याचे आदेश दिले होते." असंही गोरे म्हणाले.

यावेळी गोरे यांनी विरोधकांवर टिका केली. गोरे म्हणाले, "कोर्टाने माझी निर्दोष मुक्तता केली. लोकशाहीत सर्वोच्च न्यायालय हे सर्वोच्च आहे. न्यायालयाच्या निकालाला सहा वर्षे झाली आहेत. सहा वर्षांनी हे प्रकरण समोर आलं आहे. कोणत्या वेळी काय बोलावं, याची मर्यादा राजकीय नेत्यांनी ठेवावी." असं गोरे म्हणाले.

दरम्यान, धनंजय मुंडे यांच्या राजीनाम्यानं महायुतीला पहिला झटका बसला आहे. तर कृषिमंत्री माणिकराव कोकाटे यांच्या प्रकरणात आज सुनावणी होणार आहे. त्यातच मंत्री जयकुमार गोरे यांच्यावरील आरोपाने खळबळ उडाली आहे.