Nashik News : यंदाचा ऊस गळीत हंगाम काहीसा उशिराने सुरू झाला. त्यातच शेतकऱ्यांना यंदाच्या ऊस गळीत हंगामाचे वेध लागलेले आहे. मात्र, नुकत्याच झालेल्या निवडणुकीच्या मतदानासाठी ऊसतोड मजूर अजून थांबलेले होते.

मात्र मतदान संपताच बागलाण तालुक्यातील पश्चिम पट्ट्यातील तळवाडे दिगर, भवाडे, मळगावसह परिसरातील आदिवासी वाड्या-वस्त्या ऊसतोडणी मजुर पुन्हा कामासाठी परतले आहेत. या हंगामी स्थलांतरामुळे ओस पडू लागल्या आहेत.

तळवाडे दिगरसह परिसरातील गावातील ऊसतोड मजूर ऊसतोडणीसाठी जाण्यास सज्ज झाले असून, या मजुरांची कित्येक वर्षापासून दिवाळीही उसाच्या फडात होत असे. पण यावेळी विधानसभा निवडणुकीच्या मतदानामुळे दिवाळी सन घरी साजरा करण्याचा योग त्यांना मिळाला.

मतदान करून गावागावातील तांडे आता ऊसतोडणीसाठी रवाना होत आहेत. यंदा विधानसभा निवडणूक असल्यामुळे कारखान्याचा लांबलेल्या गळीत हंगामामुळे दिवाळी सण आपापल्या घरीच साजरा करण्याचा योग ऊसतोड मजुरांना आला. त्यांची दिवाळी घरी झाली. तालुक्यातून शेकडो कुटुंबाच्या कुटुंब ऊसतोडणीसाठी संपूर्ण जिल्ह्यासह पुणे, सोलापूर, पंढरपूर, अहिल्यानगर, धाराशीवसह वेगवेळ्या जिल्ह्यांत स्थलांतर करत आहेत.

कोयत्याला धार लावून कारखान्याच्या दिशेने

अन्नधान्य, सरपण आणि कपड्यांचे गाठोडे असा संसार घेऊन हे ऊसतोड मजुरांचे तांडे आपल्या कोयत्याला धार लावून कारखान्याच्या दिशेने आगेकूच करत आहेत. मोडका संसार पाठी घेत मूलबाळ घरी ठेवून शेकडो कामगार कारखान्याकडे निघालेले आहेत.

मिळविलेल्या उचलीतून आगामी वर्षाचे नियोजन करत लेकराबाळांच्या शिक्षणाचा खर्चाची तजवीज करून आगामी ४-५ महिने आपल्या घरापासून कोणत्यातरी फडात आता हे मजूर आपला प्रवास सुरु करत आहेत.