Space Farming : ‘इस्रो’च्या ऑर्बिटल एक्सिरिमेंट मोड्यूलमध्ये (पीओईम- पोएम-४) पालकाच्या तंतुग्रंथींची वाढ होत असल्याचे दिसून आल्याची माहिती या प्रयोगाशी संबंधित मुंबईतील अमिटी विद्यापीठाच्या शास्त्रज्ञांनी सोमवारी दिली.

‘पोएम-४’ हे मोड्यूल पृथ्वीपासून ३५० किलोमीटर अंतरावरील कक्षेत फिरत आहे. सूक्ष्म गुरुत्वाकर्षणाखाली अंतराळात वाढणारी वनस्पती हा अवकाशातील जैविक संशोधनासाठी महत्त्वाचा टप्पा आहे. तसेच दीर्घ कालावधीच्या मानवी मोहिमांमध्ये अंतराळवीरांसाठी एक वेगळा उपक्रम ठरणार आहे.

‘पोएम-४’कडून मिळालेल्या माहितीनुसार पालकाच्या तंतुग्रंथींची वाढ होत असल्याचे दिसून आल्याचे अमिटी विद्यापीठाचे कुलगुरू ए. डब्ल्यू. संतोष कुमार यांना सांगितले. ‘इस्रो’कडून मिळालेली माहिती उत्साहवर्धक आहे आणि त्यांची स्थितीही उत्तम आहे, असे ते म्हणाले.विद्यापीठाच्या खगोलविज्ञान विभागाचे कुमार हे मुख्य शास्त्रज्ञ आहेत.

प्रयोगाचा उद्देश

अंतराळ मोहिमेदरम्यान वनस्पतींच्या वाढीतून अन्न आणि पौष्टिक आहार उपलब्ध करणे.

अंतराळात वनस्पती गुरुत्वाकर्षण आणि प्रकाशाची दिशा कशी जाणतात आणि गुरुत्वाकर्षणाच्या ताणाशी जमवून घेण्यासाठी कसा बदल करतात, हे जाणून घेणे.

पृथ्वीवरील वनस्पतींच्या वाढीला चालना देण्यासाठी तसेच दीर्घकाळापर्यंत अंतराळ उड्डाण मोहिमेची मूलभूत गरज.