Nanded News : सूक्ष्मसिंचन संच बसविण्यात मुखेड, कंधार, नायगाव व बिलोली तालुक्यात झालेल्या गैरव्यवहारास संबंधित मंडळाचे मंडळ कृषी अधिकारी, त्या काळातील तालुका कृषी अधिकारी तसेच उपविभागीय कृषी अधिकाऱ्यांनी संच तपासणीत जाणीवपूर्वक दुर्लक्ष केल्याचे चौकशीत आढळून आले आहे.

त्यामुळे या प्रकरणातील संबंधित अधिकाऱ्यांविरुद्ध विभागीय चौकशी प्रस्तावित केली आहे. यामुळे यात आखणी १२ ते १५ अधिकारी गोवण्याची शक्यता आहे. संघटित पद्धतीने केलेल्या या गैरव्यवहारात अनेकांनी हात ओले करून घेतल्याची माहिती समोर येत आहे.

प्रधानमंत्री सूक्ष्मसिंचन योजना तसेच नानाजी देशमुख कृषी संजीवनी प्रकल्पांतर्गत गावात सूक्ष्मसिंचन संच बसविण्याच्या नावाखाली कृषी पर्यवेक्षक, वितरकांनी शासनाच्या मार्गदर्शक सूचनांचे उल्लंघन करून शासनाची सहा कोटी रुपयांची फसवणूक केल्याचे सिद्ध झाले आहे. या प्रकरणात १० कृषी पर्यवेक्षकांसह एक मंडळ कृषी अधिकारी व तीन वितरक दोषी आढळून आल्याने त्यांच्यावर नांदेड ग्रामीण पोलिसात गुन्हा नोंदविण्यात आला.

परंतु हे संच बसविल्यानंतर मोका तपासणीचे अधिकार असणारे संबंधित मंडळ कृषी अधिकारी, तालुका कृषी अधिकारी आणि उपविभागीय कृषी अधिकारी यांनी या कामाकडे जाणीवपूर्वक काणाडोळा करून संच तपासले नाहीत, यामुळे मोठ्या प्रमाणात गैरव्यवहाराला वाव मिळाल्याचे दिसून आले.

यासोबतच तालुका कृषी अधिकाऱ्यांनी साठा नोंदवही प्रमाणीकरणाकडे दुर्लक्ष केल्यामुळे हा संघटित गैरव्यवहाराचा प्रकार झाल्याचे नमूद केले आहे. चौकशी अहवालावरून विभागीय कृषी सहसंचालकांनी मंडळ कृषी अधिकारी, तालुका कृषी अधिकाऱ्यांसह उपविभागीय कृषी अधिकाऱ्यांविरोधात विभागीय चौकशीची शिफारस केली आहे. यामुळे यात आता आखणी १५ अधिकाऱ्यांची भर पडण्याची शक्यता आहे.

महिला कर्मचाऱ्याचा पती झाला वितरक

कंधार तालुका कृषी अधिकारी कार्यालयात असलेल्या एका महिला कृषी पर्यवेक्षकाच्या पतीने कंधार येथे सूक्ष्मसिंचन संच वितरणाचे दुकान थाटून बनावट पावत्यांच्या आधारे संच पुरविल्याचे दाखविले आहे. यात पत्नीचे प्रस्ताव सर्वाधिक होते. चौकशीत केलेल्या पाहणीत या महिला कृषी पर्यवेक्षीकेने तब्बल ४५० प्रस्ताव रक्कम वितरित करण्यासाठी पाठविले होते. यातील केवळ २५ प्रस्ताव पात्र ठरले तर ४२५ प्रस्ताव अपात्र ठरल्यामुळे शासनाच्या दोन ते अडीच कोटींची बचत झाल्याचे दिसून आले आहे.