Akola News : शेतीत उत्पादन खर्च वाढला असून यांत्रिकिकरणाच्या उपयोगाने उत्पादन खर्च कमी करावा असे आवाहन विभागीय कृषी सहसंचालक प्रमोद लहाळे यांनी केले. संत पुंडलिक महाराज यात्रा महोत्सवानिमित्त आयोजित दहाव्या कृषी प्रदर्शनात आयोजित चर्चासत्रात बोलत होते.

ते पुढे म्हणाले, की आता काळाची गरज म्हणून यांत्रिकीकरणाचा वापर करणे आवश्‍यक आहे. शासनाच्या यांत्रिकीकरणासाठी अनेक योजना आहेत. त्याचा लाभ घेत शेतकऱ्यांनी आपली उन्नती साधावी.

यावेळी अभियंता निखिल जळमकर म्हणाले, की मूर्तिजापुरात निर्मित झालेले कापूस व इतर पिकांसाठी अतिघन लागवडीचे व अतिशय कमी पैशात तयार झालेल्या यंत्राची दखल केंद्र सरकारने सुद्धा घेतली.

कृषी चर्चासत्राला प्रमुख पाहुणे म्हणून प्रयोगशील शेतकरी नंदू देशमुख व तालुका कृषी अधिकारी विठ्ठल गोरे उपस्थित होते. या कार्यक्रमाचे प्रास्ताविक प्रगती शेतकरी मंडळाचे अरुण बोंडे यांनी केले. पाहुण्यांचे स्वागत कृषी अभियंता पंकज खंडारे यांनी केले.

यावेळी विठ्ठल गोरे यांनीही शासकीय योजनांची माहिती दिली. आंतरभारतीचे प्रमोद राजनदेकर यांनी आभार मानले. चर्चासत्रात शेतकरी, विविध कृषी संघटनांचे पदाधिकारी उपस्थित होते. यात्रा महोत्सवानिमित्त आयोजित कृषी साहित्य संमेलन व कृषी प्रदर्शनाला शेतकऱ्यांनी मोठ्या प्रमाणात सहभाग घेतला.