Palghar News : जिल्ह्यातील शिक्षण, आरोग्य व पाणीपुरवठा या कामांसाठी निधी कमी पडू दिला जाणार नाही. गरज पडल्यास सामाजिक दायित्व फंडातून निधी उपलब्ध करून देण्यात येईल. शिक्षकांच्या भरतीसाठी शिक्षणमंत्र्यांशी बोलणे सुरू असून, त्यांनी सकारात्मक भूमिका घेतलेली आहे.

काही दिवसांत तो प्रश्न मार्गी लागेल, असा विश्वास जिल्हा नियोजन समितीच्या बैठकीत पालकमंत्री गणेश नाईक यांनी व्यक्त केला. पालघर नियोजन भवनमध्ये जिल्हा नियोजन समितीची बैठक बुधवारी (ता. ५) आयोजित केली होती. त्या वेळी ते बोलत होते.

मुंबई-अहमदाबाद महामार्गाच्या कामाविषयी बऱ्याच तक्रारी आहेत. या मार्गाचे काम मे अखेरपर्यंत पूर्ण होईल, असा विश्वास संबंधित विभागाने व्यक्त केला आहे. त्यासंदर्भात मंत्रालयात संबंधित विभागांची बैठक घेण्यात येईल, असे त्यांनी स्पष्ट केले.

सीएसआरमधून विकास

वाढवण बंदराशेजारील वन विभागाच्या ५०० एकरच्या जागेसाठी अनेक उद्योग उभारण्यासाठी प्रयत्न चालू आहेत. आगामी काळात ५० हजार कोटींची गुंतवणूक होणार असून, सीएसआरमधून विकास होऊ शकेल, असेही मंत्र्यांनी सांगितले.

रिक्त पदे भरण्याचे आश्‍वासन

जिल्ह्याच्या विकासासाठी अर्थमंत्री अजित पवार यांना स्थानिक परिस्थितीची जाणीव करून कामांसाठी वाढीव निधीसाठी प्रयत्न करण्यात येईल. जिल्ह्याच्या विकासामध्ये भेदभाव करण्यात येणार नाही. शैक्षणिक सुविधाचा स्तर उंचावण्यासाठी आवश्यक पायाभूत सुविधा, शौचालये, तसेच तरुणांसाठी कौशल्य विकास कार्यक्रम हाती घेण्यात येतील.

आरोग्य विभागात सोनोग्राफी टेक्निशियन, शिक्षण क्षेत्रात शिक्षकांची रिक्त पदे भरण्यासाठी संबंधित विभागाच्या मंत्र्यांशी चर्चा झाली आहे.आरोग्य, शिक्षण व पाणीपुरवठा याविषयीचा अहवाल मी जिल्हाधिकाऱ्यांकडे याआधीच बोलून मागणी केली आहे. जिल्ह्यातील आरोग्यसेवेचा दर्जा उंचवण्यासाठी आवश्यक निधी उपलब्ध करून देणार आहे.