Pune News: मुंबई बाजार समितीमधील कर्मचारी आणि वाहतूकदार यांच्या संगनमताने प्रवेशद्वारावर बाजार शुल्क (सेस) चोरी सुरू झाली आहे, असे पत्र दि फ्रंट ऑफ युनायटेड फ्रूट्‌स असोसिएशनने बाजार समिती प्रशासनाला देत, आम्हीच सेस चोरीच्या गाड्या पकडून, प्रशासनाच्या निदर्शनास आणून दिल्या आहेत, असे सांगत सेस संकलनासाठी डिजिटल पेमेंटचा प्रस्ताव बाजार समितीला दिला आहे. त्याची अंमलबजावणी करावी, अशी मागणी केली आहे.

‘मुंबई बाजार समितीमधील सेस चोरीवर शिक्कामोर्तब’ या मथळ्याखाली ‘ॲग्रोवन’मधून बुधवारी (ता. २) वृत्त प्रसिद्ध झाल्यावर, व्यापारी संघटनेने आपली बाजू मांडण्याचा प्रयत्न केला. याबाबतचे तातडीने पत्र संघटनेने बाजार समिती प्रशासनाला दिले आहे. पत्रात म्हटले आहे, की पणन कायद्यानुसार बाजार समितीमध्ये कृषी उत्पन्नाचे वजन किंवा मोजणी करण्यात आल्यानंतर निश्‍चित करण्यात आलेली बाजार फी, ताबडतोब भरणे हे खरेदीदार, अडते, प्रक्रियाकार आणि व्यापारी यांचे कर्तव्य आहे.

या कायद्यानुसार नागपूर बाजार समितीमध्ये संपूर्ण सेस वसुली ही प्रवेशद्वारावर होते. त्याच बाजार समितीने कायद्यानुसार फळ बाजार येथे २००२ पासून थेट खरेदीदारांकडून सेस वसुली पद्धत सुरू केली आहे, त्यामुळे बाजार समितीच्या उत्पन्नात वाढ झाली आहे.
हीच पद्धत मुंबई बाजार समितीमध्ये सुरू असून, कालांतराने बाजार समिती कर्मचारी व वाहतूकदार यांच्या संगनमताने गेटवर सेस चोरी सुरू झाली.

ही बाब बाजार समितीमधील अडते, व्यापारी यांनीच बाजार समितीच्या निदर्शनास आणून दिली. ही गेटवरची सेस चोरी थांबविण्यासाठी डिजिटल पेमेंटचा प्रस्ताव व्यापाऱ्यांनीच बाजार समितीला दिला असून, याद्वारे सेस थेट बाजार समितीच्या खात्यावर जमा होणार आहे. यामुळे बाजार समितीचा सेस बुडणार नाही. एखादा व्यापारी सेस कमी भरत असेल, तर त्याच्यावर त्वरित कारवाई करण्यात यावी. शेतीमालाची आवक-जावक किती झाली याची त्वरित माहिती मिळणार आहे. त्यामुळे डिजिटल पेमेंटची त्वरित अंमलबजावणी करावी, अशी मागणी संघटनेने केली आहे.