Maratha Andolan in Maharashtra : आंतरवाली सराटी (जि.जालना) येथे मराठा आरक्षणाच्या मागणीसाठी आंदोलकांवर लाठीचार्ज केल्याच्या निषेधार्थ सोमवारी (ता.चार) परभणी जिल्हयात दोन ठिकाणी रस्तारोको आंदोलन करण्यात आले. तर गंगाखेड शहरासह पोखर्णी नृसिंह गावात कडकडीत बंद पाळण्यात आला.

परभणी जिल्ह्यात आंतरवाली सराटी (जि.जालना) येथील घटनेचे पडसाद उमटत आहेत. सोमवारी (ता.४) जिल्ह्यात विविध ठिकाणी निरनिराळे आंदोलने करण्यात आली. गंगाखेड शहरात कडकडीत बंद पाळण्यात आला. या ठिकाणी सर्व पक्षीय मोर्चा काढण्यात येवून तहसिलदारांना घटनेच्या निषेधार्थ निवेदन सादर करण्यात आले.

येथील चौकात मोर्चाचे रुपांतर सभेत करण्यात आले. पोखर्णी नृसिंह (ता.परभणी) या गावात सकाळपासूनच कडकडीत बंद पाळण्यात आला. पोखर्णी फाट्यावर सकाळी १० वाजता जोरदार रस्तारोको करण्यात आला.

या रस्तारोको आंदोलनात पोखर्णीसह आजू -बाजूच्या गावातील मराठा समाजातील लोक सहभागी झाले होते. हा रस्तारोको दीड ते दोन तास चालला. पोलिस अधिक्षक रागसुधा आर. यांनी आंदोलकांची भेट घेवून निवेदन स्विकारले. दरम्यान, जिल्ह्यात सुरु असलेल्या आंदोलनाच्या पार्श्वभूमीवर परभणी आगारासह इतर आगारातून बससेवा बंद ठेवण्यात आली होती. एकाही आगारातून सोमवारी बस गाडी धावल्या नाहीत.