Nashik News : मांडवड व आझादनगर येथे मार्च व एप्रिल २०२३ मध्ये झालेल्या अतिवृष्टी व गारपिटीमुळे शेतीचे मोठ्या प्रमाणात नुकसान झालेल्या शेतकऱ्यांना अद्याप भरपाई मिळालेली नाही.

वारंवार निवेदनाद्वारे मागणी करूनही मदत न मिळाल्याने अनुदानाची रक्कम मिळण्यासाठी शेतकऱ्यांनी मंगळवारपासून (ता. ३) मांडवड ग्रामपंचायतीच्या कार्यालयाजवळ उपोषण सुरू केले. लेखी आश्वासन मिळत नाही, तोपर्यंत उपोषण सुरूच ठेवण्याचा निर्धार शेतकऱ्यांनी केला.

तालुका कृषी अधिकाऱ्यांना दिलेल्या निवेदनानुसार अतिवृष्टी आणि गारपीट होऊन सहा-सात महिने होऊनही मागणीची दखल घेतली गेलेली नाही, तालुका कृषी अधिकाऱ्यांकडे मागणी करण्यात आली आहे. मात्र आम्हाला नेहमीच आठ दिवसांचा कालावधी देऊन वेळ मारून नेण्यात येत आहे.

त्यामुळे आम्हाला आता उपोषणाशिवाय पर्याय नाही, असे त्यांनी भेटीसाठी आलेल्या तहसीलदार डॉ. सिद्धार्थ मोरे, गटविकास अधिकारी गणेश चौधरी, कृषी अधिकाऱ्यांना सांगितले. अनुदान मिळण्याच्या कार्यवाहीचे लेखी पत्र मिळेपर्यंत आंदोलन सुरूच ठेवण्याचा निर्धार बोलून दाखविला.

विठ्ठल आहेर, सुशील आंबेकर, दत्तात्रय थेटे, बंडू थेटे, शरद काजळे, अण्णा दुलचंद आहेर, वाल्मीक थेटे, अशोक निकम, दीपक गडाख, बाबासाहेब आहेर, दीपक साळुंखे आदी शेतकरी उपोषणास बसले आहेत.