Buldana News : मागील दोन-तीन हंगामापासून जिल्ह्यात मक्याचे पीक मोठ्या क्षेत्रावर लागवड होऊ लागले आहे. यंदाच्या रब्बीत तब्बल ३१ हजार हेक्टरपेक्षा अधिक लागवड झालेली असून, जिल्ह्यात एकरी उत्पादकता अनेक जण ४० ते ५० क्विंटलपर्यंत मिळवू लागले आहे. कमी दिवसांत तयार होणारे हे पीक आता एक सक्षम पर्याय म्हणून पुन्हा पाय रोवत आहे.

विदर्भात मक्याची सर्वाधिक लागवड बुलडाणा जिल्ह्यात होत असते. व्यवस्थापनातील सोयी, मागणी, बाजारपेठेची उपलब्धता, चांगले उत्पादन, जनावरांसाठी चाऱ्याची उपलब्धता अशा विविध कारणांनी मका लागवडीचा कल वाढला आहे.

यंदा रब्बीत सर्वाधिक ३१ हजार १७३ हेक्टरवर मक्याची पेरणी झाली. जिल्ह्यात सर्वाधिक मका लागवड मोताळा, नांदुरा, मलकापूर या तालुक्यांमध्ये होत आहे. यंदा मोताळ्यातील शेतकऱ्यांनी ७२३१ हेक्टरवर पेरणी केली. यंदा पीक जोमदार असून काही शेतकऱ्यांनी काढणी सुरू केली. यातील काही शेतकऱ्यांनी एकरी ४५ ते ५० क्विंटलपर्यंत उत्पादन मिळवले आहे.

यंदाची तालुकानिहाय लागवड (हेक्टरमध्ये)

जळगाव जामोद लागवड १९४५ (सरासरी ६०७), संग्रामपूर १२३० (१०६०), चिखली १९४६ (१११७), बुलडाणा ३८६८ (२६५९), देऊळगावराजा १८५० (११७६), मेहकर ५२७ (१९५), सिंदखेडराजा ५२४ (५७९), लोणार १४१० (२३८), खामगाव ३६७० (५३६), शेगाव ३५, मलकापूर ४४४५ (१२३३), मोताळा ७२३१ (१२७१) आणि नांदुरा तालुक्यात ३७२५ (८५६)

लागवड वाढण्याची कारणे

- मका पिकात तणनाशकाचा वापर करणे सोयीचे.

- जमीन मध्यम-भारी असल्याने पिकाला पोषक.

- इथेनॉलमध्ये मका वापराला मान्यता मिळाल्याने सातत्याने मागणी.

- कमी दिवसांत येणारे पीक.

- हेक्टरी उत्पादकता ३२ क्विंटल.

- अनेक शेतकऱ्यांचे एकरी उत्पादन ४५ ते ५० क्विंटलपर्यंत.

- अधिक उत्पादकता देणाऱ्या वाणांची उपलब्धता वाढली.

- चाऱ्याची उपलब्धता वाढते.

जिल्ह्याची लागवड

सरासरी ११७८१

प्रत्यक्ष लागवड- ३११७३ हेक्टर

टक्केवारी-२६४