Ahilyanagar News : अहिल्यानगर : महावितरणच्या ग्राहकांना अखंडित व शाश्वत वीजपुरवठा मिळावा यासाठी शासनाच्या धोरणानुसार सौर कृषी वाहिनी योजना २.०, प्रधानमंत्री सूर्याघर मोफत वीज योजना आणि मागेल त्याला सौरपंप या सौर योजनांची अंमलबजावणी करण्यात येत आहे. या योजनांमुळे कृषी ग्राहकांना दिवसा वीज उपलब्ध होणार आहे.

त्यामुळे या सर्व सौर योजनांच्या प्रगतीकडे प्राधान्याने लक्ष देऊन या प्रकल्पांना येणाऱ्या अडीअडचणी सोडविण्यासाठी सर्वांची मदत घ्या आणि या सर्व सौर योजनांच्या प्रकल्पांची अंमलबजावणी गतीने पूर्ण करावीत, असे निर्देश महावितरणचे कार्यकारी संचालक (वितरण) दत्तात्रय पडळकर यांनी दिले.

अहिल्यानगर येथील विद्युत भवनातील सभागृहात महावितरणच्या अहिल्यानगर मंडळातील सर्व अभियत्यांची व अधिकाऱ्यांची आढावा बैठक झाली. महावितरणच्या नाशिक परिमंडळाचे प्रभारी मुख्य अभियंता ज्ञानदेव पडळकर, अधीक्षक अभियंता रमेशकुमार पवार उपस्थित होते. पडळकर यांच्याकडे नाशिक परिमंडळाचे पालकत्व देण्यात आलेले असून त्यानुसार प्रथमच अहिल्यानगर मंडळाची बैठक घेतली.

यामध्ये विविध विषयांचा व योजनांचा संगणकीय सादरीकरणाच्या माध्यमातून सविस्तर आढावा घेतला, मुख्यमंत्री तथा ऊर्जामंत्री देवेंद्र फडणवीस यांनी कृती कार्यक्रम निश्चित करून दिला आहे. त्यानुसार १०० दिवसांत महावितरणाने प्राधान्याने करावयाचे कामाचे नियोजन करून प्रभावी अंमलबजावणी करावी असे निर्देश दत्तात्रय पडळकर यांनी दिले.

थकबाकीदार ग्राहकांकडून वापरलेल्या वीज देयकांची १०० टक्के थकबाकी वसुली करणे अत्यावश्यक आहे, अन्यथा थकबाकीदारां ग्राहकांचा पुरवठा नियमानुसार खंडित करा. वीजपुरवठा कायमस्वरूपी खंडित करण्यापेक्षा विजेचे पैसे वेळेत वसूल करणे महत्त्वाचे असून त्यासाठी पाठपुरावा करण्याचे निर्देश त्यांनी दिले.

‘ग्राहकांना सेवा द्या’
ग्राहकसेवा व वीज देयक थकबाकी वसुली या सर्व कामासाठी सर्व अभियंते व कर्मचारी यांनी आपल्या कार्यालयात दररोज वेळेत पोहचून कामाचे दैनंदिन नियोजन केले पाहिजे. नियामक आयोगाने निर्धारित केलेल्या कालावधीत ग्राहकांना सेवा न दिल्यास संबंधितांवर नियमानुसार कारवाई करण्यात येईल असा इशारासुद्धा त्यांनी दिला.