Chh. Sambhajinagar News : अखंडित वीजपुरवठ्यासह ग्राहकांना सर्वोत्तम सेवा द्या तसेच वीजचोरी रोखण्यासह महसूलवाढीकडे लक्ष द्या, असे निर्देश महावितरणचे संचालक (संचालन) अरविंद भादिकर यांनी दिले. संत एकनाथ रंगमंदिरात नुकत्याच झालेल्या महावितरणच्या छत्रपती संभाजीनगर शहर मंडलातील अधिकारी, कर्मचारी तसेच तंत्रज्ञांच्या संवाद मेळाव्यात ते बोलत होते.

यावेळी प्रभारी सहव्यवस्थापकीय संचालक धनंजय औंढेकर, मुख्य अभियंता पवनकुमार कछोट, अधीक्षक अभियंता मनीष ठाकरे यांची प्रमुख उपस्थिती होती. श्री. भादिकर म्हणाले, की अत्यावश्यक सेवा क्षेत्रात आपण कार्यरत असून, वीजग्राहकांना अखंडित वीजसेवा देणे ही आपली महत्त्वाची जबाबदारी आहे.

वीजपुरवठा खंडित झाला की अभियंते, कर्मचारी बिघाड दुरुस्त करतात. मात्र बिघाडच होऊ नये या दृष्टीने नियोजन करून संपूर्ण कार्यक्षमतेने प्रयत्नरत रहावे. वीजबिल थकबाकी वसुलीकडे गांभीर्याने लक्ष द्या, असे निर्देश त्यांनी दिले.

श्री. औंढेकर यांनीही कर्मचाऱ्यांशी संवाद साधला. शहरात खंडित वीजपुरवठ्याचा प्रश्न गंभीर आहे. एक फीडर ट्रीप झाला तर निर्माण होणाऱ्या उष्णतेमुळे सुमारे १० हजार युनिट विजेचे नुकसान होते. त्यामुळे प्रत्येक अभियंता, तंत्रज्ञाने वीजवाहिन्यांच्या देखभाल-दुरुस्तीकडे लक्ष द्यावे.

वीजग्राहकांच्या घरात वीज पोचवण्यासाठी जवळपास साडेआठ रुपये खर्च येतो तो वसूल करण्यासाठी सातत्याने प्रयत्न करावेत. सर्व तांत्रिक कर्मचाऱ्यांना आवश्यक सुरक्षा साधने देण्याचे आश्वासन औंढेकर यांनी याप्रसंगी दिले. प्रज्ञा दिवेकर यांनी सूत्रसंचालन केले. संवाद मेळाव्यास शहर मंडलातील सर्व कार्यकारी अभियंते, उपविभागीय अभियंते, शाखा अभियंते, तंत्रज्ञ तसेच मानव संसाधन व लेखा विभागाचे अधिकारी उपस्थित होते.