Solapur News : संत ज्ञानेश्वर महाराज पालखी मार्ग व संत तुकाराम महाराज पालखी मार्गावरील ग्रामपंचायती तसेच इतर मानाच्या पालखी मार्गावरील ग्रामपंचायतींमध्ये व परिसरात २१ जुलै ते २५ जुलै या कालावधीत ‘महा स्वच्छता अभियान’ राबविण्याच्या सूचना सोलापूर जिल्हा परिषदेच्या प्रशासक तथा मुख्य कार्यकारी अधिकारी मनिषा आव्हाळे यांनी दिल्या आहेत.

आषाढी एकादशी नंतर दुसऱ्या दिवशी लगेच मुख्य कार्यकारी अधिकारी आव्हाळे यांनी व्हीसी घेऊन पालखी मार्गावर साचलेला कचरा हटविण्याच्या सूचना दिल्या आहेत. आषाढी यात्रा कालावधीत पालखी मार्गावरील ग्रामपंचायतींनी चांगले काम केले आहे. भाविकांना चांगल्या सेवा दिल्या, त्याचबरोबर ग्रामपंचायतीमध्ये स्वच्छतेचे सातत्य टिकवून ठेवले आहे.

पालखी मार्गावरील गावात स्वच्छता करण्याची आवश्यकता असून, त्या दृष्टीने कार्यवाही करण्याच्या सूचना आव्हाळे यांनी दिल्या आहेत. पाच दिवसाच्या या महास्वच्छता अभियानात पालख्या मार्गावरील ग्रामपंचायती बरोबरच गावठाण व परिसरात वास्तव केल्यामुळे प्लॉस्टिकसह अन्य कचरा गोळा झालेला आहे,

तो वर्गीकरण करून संकलित करावा. संकलित केलेला कचरा जाळून नये, पालखी मार्गावरील डिव्हायडर (रस्ता दुभाजक) यामध्ये कचरा पडलेला आहे. झाडात अडकलेला कचरा काढून टाकण्याच्या सूचना दिलेल्या आहेत. फेकून दिलेल्या अन्नाचे अयोग्य व्यवस्थापन झाल्यास त्यामध्ये विषारी घटक तयार होऊन ते पावसाच्या पाण्यात मिसळून पिण्याच्या पाण्याच्या स्तोत्रामध्ये मिसळण्याची दाट शक्यता आहे, त्या दृष्टीने काळजी घेण्याच्या सूचनाही त्यांनी दिल्या होत्या.

नोडल अधिकाऱ्यांची नेमणूक

पालखी मार्गावरील स्वच्छता योग्य पद्धतीने व्हावी, यासाठी पालखी मार्गावरील गावासाठी नोडल अधिकारी नेमलेले आहेत. स्वच्छतेच्या कामात कोणी कुचराई करू नये. घनकचऱ्याचे वर्गीकरण करून व्यवस्थापन केलेल्या कामाची माहिती फोटोसह अहवाल या कार्यालयात पाठविण्यात यावा, असेही आव्हाळे यांनी सांगितले.