Solapur News : गेल्या दोन दिवसांपासून पिंपळनेर परिसरात बिबट्या सदृश प्राण्याचा वावर असून, गुरुवारी (ता. २१) पहाटे दोन शेळ्यांवर बिबट्यासदृश प्राण्याने हल्ला केला. मागील दीड वर्षाच्या कालावधीत या परिसरात होणारा हा चौथा हल्ला आहे.

या घटनेने नागरिकांमध्ये भीतीचे वातावरण निर्माण झाले आहे. दरम्यान, वनविभागाच्या वतीने नागरिकांना घाबरून न जाता दक्षता घेण्याचे आवाहन करण्यात आले आहे.

गेल्या चार-पाच वर्षांपासून या परिसरात बिबट्यासदृश प्राण्याचा वावर वाढला असून, बुधवारी सकाळी साडेसात वाजता जय भवानवाडी येथे द्राक्ष बागेत फेरफटका मारताना नंदकुमार दत्तात्रय लोंढे यांना बागेतच दडून बसलेला बिबट्यासदृश प्राणी दिसला.

आरडाओरडा झाल्यानंतर तिथून तो पुढे उसाच्या शेतात गेल्याचे लोंढे यांनी पाहिले. गुरुवारी पहाटे तीन ते पाचच्या दरम्यान शिराळ हद्दीतील वस्तीवरील सतीश हरिदास टोणपे यांच्या घरासमोर बांधलेल्या दोन शेळ्यांवर बिबट्यासदृश प्राण्याने हल्ला केला, त्यात त्या जागीच ठार झाल्या.

दरम्यान, वन विभागाच्या वतीने पिंपळनेर, शिराळ येथे बिबट्यासदृश प्राण्याचा वावर असणाऱ्या परिसरात प्राण्यांच्या पावलांचे ठसे घेण्यात आले असून, वनपाल अबा लटके, वनरक्षक सायरा सय्यद, अनिल राठोड, नितीन यादव, तानाजी दळवी आदींनी घटनास्थळाची पाहणी करीत मार्गदर्शन केले.