Chh. Sambhajinagar News : खाली ओल त्यात उन्हाची ऑक्टोबर हीट यामुळे छत्रपती संभाजीनगर व जालना जिल्ह्यातील कपाशीच्या पिकात मोठ्या प्रमाणात पातेगळ होते आहे. शिवाय काही ठिकाणी होत असलेल्या अधून मधून च्या पावसाने बोंडसडीचे प्रमाणही कायम असल्याची माहिती शेतकऱ्यांनी दिली.

मराठवाड्यात यंदा परभणी, लातूर वगळता एकाही जिल्ह्यात कपाशीची अपेक्षित लागवड झाली नाही. शिवाय हवामानाच्या प्रतिकुलतेचे संकट संपले नसल्याने कापूस उत्पादकांची चिंता कायम आहे. छत्रपती संभाजीनगर कृषी विभागाअंतर्गत तीन जिल्ह्यात सरासरी १० लाख ५९ हजार ३२४ हेक्टर क्षेत्राच्या तुलनेत ९ लाख १८ हजार ३ हेक्टरवरच कपाशीची लागवड झाली.

दुसरीकडे लातूर कृषी विभागाअंतर्गत पाच जिल्ह्यात सर्वसाधारण ४ लाख ८५ हजार ८८ हेक्टर क्षेत्राच्या तुलनेत ४ लाख ५४ हजार ८०६ हेक्टर क्षेत्रावरच कपाशीची लागवड झाली. प्रामुख्याने छत्रपती संभाजीनगर, जालना, बीड, परभणी, नांदेड हे जिल्हे कापूस उत्पादक जिल्हे म्हणून ओळखले जातात. यापैकी परभणी वगळता एकाही जिल्ह्यात कपाशीची अपेक्षित लागवड झाली नाही.

कपाशीचे पीक सध्या पाते, फुले व बोंड धरण्याच्या अवस्थेत आहे. छत्रपती संभाजीनगर व जालना जिल्ह्यातील शेतकऱ्यांच्या माहितीनुसार, सध्या जेवढी पाते लागले तेवढेही गळून पडत आहेत.

काही भागात १५ ते २० तर काही भागात २० ते ३० बोंड पकलेली आहेत. सतत होणाऱ्या पावसामुळे काही ठिकाणी खालची बोंड पूर्णतः काळी पडली आहेत. कपाशी लालसर होत असून पानेही वाळून चालली आहेत. यंदा उत्पादनात याचा मोठा फटका बसेल, अशी माहिती शेतकऱ्यांनी दिली