Nagpur News: ‘‘विदर्भात वन्यक्षेत्र मोठे असून जंगललगतच्या बफर झोनमधील शेतजमिनी सरकार सौरऊर्जा प्रकल्पासाठी भाडेतत्वावर घेणार आहे,’’ अशी माहिती महसूलमंत्री चंद्रशेखर बावनकुळे यांनी दिली.

नागपुरात मंगळवारी (ता.१७) माध्यमांशी ते बोलत होते. श्री. बावनकुळे म्हणाले, की पूर्व विदर्भातील बहुतांश जिल्हे हे जंगलव्याप्त आहेत. गडचिरोली जिल्ह्याचा ७० टक्‍के भाग हा जंगलाने व्यापलेला आहे. वनक्षेत्रामुळे या भागात वन्यप्राण्यांचा वावर ही वाढता आहे. त्यामुळेच या भागात व्याघ्र प्रकल्पांचे प्रमाण अधिक आहे.

यातूनच वनक्षेत्रानजीक असलेल्या बफर झोनमधील शेती आणि गावांमध्ये मानव-वन्यजीव संघर्ष वाढत त्यातूनच सामान्यांचे बळी जाण्याचे प्रकार वाढले आहेत. या सर्व बाबींची दखल घेत वनक्षेत्राला लागून असलेल्या तसेच बफर झोनमधील जमिनी शेतकऱ्यांकडून ५० हजार रुपये एकर प्रमाणे भाडेतत्त्वावर घेण्याचा प्रस्ताव आहे.

मुख्यमंत्री सौर वाहिनी योजनेअंतर्गत या जमिनी आम्ही घेणार आहोत. या परिसरात बांबू सोबतच चारा पिकांची लागवड केली जाईल. या माध्यमातून वन्यप्राण्यांना चराईसाठी कुरणाचा पर्याय उपलब्ध होणार आहे. या उपायातून शेतकरी, शेतमजुरांचा जीव वाचण्यास मदत होईल, असा विश्‍वास श्री. बावनकुळे यांनी व्यक्‍त केला. सर्व बफर जमिनी भाडेतत्त्वावर घेण्याची तयारी सरकारने सुरू केल्याचेही त्यांनी सांगितले.

‘नुकसान भरपाई देणार’

मुख्यमंत्री देवेंद्र फडणवीस यांनी गेल्या आठवड्यातील मंत्रिमंडळ बैठकीत नुकसानीसंदर्भात आढावा घेतला. त्यानंतर आता शासन नुकसान भरपाईसाठी सकारात्मक असून त्या पार्श्‍वभूमीवर सर्व्हेक्षण व पंचनामे केले जाणार आहेत, असेही श्री. बावनकुळे यांनी सांगितले.