Chandrapur News : कापूस नगदी पीक आहे. त्यामुळे शेतकरी मोठ्या प्रमाणात कापूस पिकांची लागवड करतात. यंदा बाहेरील मजूर कापूस वेचणीला आले नाही. त्यामुळे वेचणीअभावी कापूस उत्पादक शेतकऱ्यांचे हाल होत आहेत. काही शेतकऱ्यांवर दोन वेळेची कापूस वेचणी एकाच वेळेस करावी लागत आहे. त्यामुळे लाखमोलाचा कापूस अजूनही झाडावरच आहे.

यंदा कापूस उत्पादक शेतकऱ्यांच्या अडचणी संपायला तयार नाही. उत्पादन खर्च जास्त व उत्पादन कमी अशी शेतकऱ्यांची बिकट अवस्था झाली आहे. शेतकरी दिवसेंदिवस महागाईच्या तडाख्यात भरडला जात आहे.

नापिकीने शेतकऱ्यांवर कर्जाचा डोंगर वाढत चालला आहे. शेतकऱ्यांना कापूस वेचणी करायला मजूर मिळणे कठीण झाले आहे. कापूस वेचणी करण्यासाठी अजूनही मजूर मिळत नसल्याने झाडावरच शिल्लक आहे.

कापूस वेचणी करायला मजूर मिळत नसल्याने मजुरांअभावी शेत कापसाचे पांढरे रान झाल्याची स्थिती राजुरा तालुक्यात असल्याने शेतकऱ्यांची चिंता वाढली आहे. मजूर मिळाले नसल्याने शेतकऱ्यांवर दोन वेळेची कापूस वेचणी एकाचवेळी करण्याची पाळी आली. आता कापूस झाडावरच हलका आल्याने मजूर कापूस वेचणी करायला तयार नाही.

कापूस उत्पादकांचे हाल यंदा संपायला तयार नसल्याने शेतकरी काकुळतीला आले आहे. कापूस पिकावर होणारा खर्च मोठा आहे. सुरुवातीपासून शेतकऱ्यांना कापूस पिकांवर जास्त खर्च करावा लागतो. त्या तुलनेत कापूस शेतकऱ्यांना परवडत नाही.

यंदा कापूस वेचणी करायला मजूर मिळत नसल्याने ११ रुपये प्रति किलो प्रमाणे कापूस वेचणी करावी लागत आहे किंवा बाहेरून ऑटोने मजूर आणून कापूस वेचणी करावी लागत आहे.