Kolhapur News: कोल्हापूर जिल्हा परिषदेच्या प्रत्येक योजनांमध्ये महिला, शिक्षण आणि आरोग्याला प्राधान्य दिले आहे. जिल्हा परिषदेचा ४३ कोटी ६५ लाख ६ हजार ३६५ रुपये रुपयांचे अंदाजपत्रक सादर केले. मुख्य लेखाधिकारी अतुल आकुर्डे यांनी हे अंदाजपत्रक मुख्य कार्यकारी अधिकारी कार्तिकेयन एस. यांच्याकडे सुपूर्द केले.

समृद्ध शाळा, समृद्ध दवाखाना, समृद्ध महिला अशी उद्दिष्ट्ये ठेवून हे सर्वसमावेशक अंदाजपत्रक सादर केले आहे. प्राथमिक शिक्षणासाठी पाच कोटी ७१ लाख रुपयांची, आरोग्यासाठी दोन कोटी ८४ लाखांची तरतूद केली आहे. मुख्य कार्यकारी अधिकारी कार्तिकेयन एस. यांच्या अध्यक्षतेखाली २०२५-२०२६ चे अंदाजपत्रक सादर केले.

कार्तिकेयन एस. म्हणाले, की जिल्हा परिषद स्वनिधीचे व पाणीपुरवठ्याच्या देखभाल दुरुस्ती निधीचे, तसेच पंचायत समिती स्वनिधीचे २०२४-२५ चे ३९ कोटी ७८ लाख २३ हजार ७५८ अंतिम सुधारित अंदाजपत्रक आणि २०२५-२६ चे ४३ कोटी ५१ लाख ७७ हजार २०० रुपयांचे मूळ अंदाजपत्रक सादर केले.

२०२५-२६ च्या आरंभीच्या शिलकीसह संभाव्य जमा रकमेसह ४३ कोटी ६५ लाख ६ हजार ३६५ रुपयेमधून खर्चासाठी एकूण रक्कम ४३ कोटी ५१ लाख ७७ हजार २०० रुपयांची तरतूद केली आहे. १३ लाख हजार १६८ शिलकीचाही समावेश केला.

ते पुढे म्हणाले, की शासनाने संगणक प्रणालीमुळे तो-तो निधी ज्या-त्या ठेकेदार, कंत्राटदार किंवा इतर कामांसाठी थेट मिळणार आहे. या निधीवर जिल्हा परिषदेला सुमारे १० ते १२ कोटी रुपये व्याज मिळत होते. हे व्याज आता मिळणार नाही. त्यामुळे उत्पन्नाचा स्रोत वाढवण्यासाठी मुद्रणालय सुरू करून केले जाईल.

यातून प्रतिवर्षी सुमारे १ ते २ कोटी रुपये उत्पन्न मिळू शकते. जिल्हा परिषद सभापती निवास्थानासमोरील रिकाम्या जागेमध्ये सभागृह बांधून भाड्याने दिले जाईल. यातून वर्षाला ५० लाख रुपये उत्पन्न मिळेल. भाऊसिंगजी रोड येथील जिल्हा परिषद मालकीच्या इमारतीचा पुनर्विकास केला जाईल.