Kolhapur News : जिल्ह्यात आतापर्यंत ५३ हजार ५८० हेक्टर क्षेत्रावर पेरण्या झाल्या आहेत. काही भागांत पावसाने उघडीप दिल्याने वाफसा आलेल्या ठिकाणी पेरणी करण्यात येत आहे. परंतु काही ठिकाणी जमिनीतील ओलावा कमी झाला नसल्याने खरीप हंगामासाठी जमिनीची पूर्वमशागत करण्यात अडचणी येत आहेत. जिल्ह्यामध्ये काही प्रमाणात भाताची धूळवाफ पेरणी केली जाते, तसेच उर्वरित क्षेत्रामध्ये रोपलागण केली जाते. घात आलेल्या क्षेत्रावर पेरण्यांना सुरुवात झाली आहे.

मे महिन्यात मॉन्सूनपूर्व पावसामुळे शेतात पाणी साचून राहिल्याने काढणीला आलेल्या पिकांचे मोठे नुकसान झाले. त्यात बागायत पिकांचे १८५९.३५२ हेक्टरवरील नुकसान झाले आहे.

यामध्ये भुईमूग, भाजीपाला, केळी, मका, उन्हाळी भात, सूर्यफूल, ऊस, तीळ, मिरची फुलपिके, उन्हाळी उडीद, मूग, सोयाबीन, कांदा व इतर पिकांचा समावेश आहे. फळ पिकाखालील ९.७३ हेक्टरवरील पिकांचे नुकसान झाले. यामध्ये आंबा, पेरू, काजू व इतर पिकांचा समावेश आहे.

दृष्टिक्षेपात पेरणी (हेक्टर)

भात २५,५४४, ज्वारी १५७, नाचणी रोपवाटिका ५१४, मका ३४, भुईमूग ७,०९६, सोयाबीन २०,१४६, तूर, मूग, उडीद व इतर कडधान्ये ७४ एकूण ५३,५८० हेक्टर उसाचे सर्वसाधारण १ लाख ९८ हजार ६०४ हेक्टर क्षेत्र निश्चित केले आहे. हातकणंगले, शिरोळ व पन्हाळा तालुक्यात आडसाली हंगामपूर्व लागणीची कामे सुरू आहेत. आजअखेर १,०९३ हेक्टर क्षेत्रावर लागण झाली आहे.

तालुकानिहाय पेरणी

क्षेत्र (हेक्टर)

हातकणंगले ७,७६२

शिरोळ ४३०

पन्हाळा २,५९८

शाहूवाडी ३,१४१

राधानगरी २,०९४

गगनबावडा १८

करवीर २,६४०

कागल ९,२०५

गडहिंग्लज १६,७१६

भुदरगड ५,८५२

आजरा २,३३६

चंदगड ७८८