Kolhapur Gokul Dudh : कोल्हापूर जिल्हा सहंकारी दूध संघाचे (गोकुळ) अध्यक्ष अरुण डोंगळे यांनी अखेर मंगळवारी (ता. २०) सकाळी राजीनामा दिला. राजीनाम्याचे पत्र ज्येष्ठ संचालक विश्वास पाटील यांच्याकडे देण्यात आले. त्यांनी तातडीने संघाचे कार्यकारी संचालक डॉ. योगेश गोडबोले यांच्याकडे हे पत्र सादर केले.

गुरुवारी (दि. २२) संचालक मंडळाची बैठक होत असून यामध्ये डोंगळे यांचा राजीनामा मंजूर केला जाणार आहे. गेल्या काही दिवसांपासून त्यांच्या राजीनाम्याविषयी उलटसुलट चर्चा सुरू होत्या. स्थानिक पातळीवरून हा विषय मुख्यमंत्र्यांच्या कोर्टात गेल्याने श्री. डोंगळे काय निर्णय घेतात याकडे सर्वांचे लक्ष लागले होते.

श्री. डोंगळे यांनी राजीनामा देण्याच्या नियोजित बैठकीदिवशी दांडी मारून खळबळ उडवून दिली होती. यानंतर मात्र वरिष्ठ नेत्यांनी श्री. डोंगळे यांना समजवल्याने अखेर त्यांनी राजीनामा देण्यास संमती दिली. नवीन अध्यक्षपदासाठी संस्थापक कै. आनंदराव पाटील चुयेकर यांचे पुत्र शशिकांत पाटील चुयेकर यांचे नाव चर्चेत आहे.