Sangli News : जिल्ह्यात खरीप हंगामातील पेरणी अंतिम टप्प्यात आली असून, २ लाख २८ हजार १८९ हेक्टर म्हणजे ८९ टक्के पेरा झाला आहे. सर्वाधिक मक्याची पेरणी झाली आहे. यंदाच्या आडसाली हंगामातील ऊस लागवडीचे नियोजन शेतकरी करू लागला आहे.

जिल्ह्यात खरिपाचे सरासरी क्षेत्र २ लाख ५५ हजार ९८४ हेक्टर आहे. जून महिन्यात २२६ मिलिमीटर पावसाची नोंद झाली. यंदाच्या खरीप हंगामात वेळेत पाऊस झाल्याने खरीप हंगामातील पिकांच्या पेरण्या वेळेत सुरू झाल्या. जिल्ह्यात २ लाख २२ हजार १८९ हेक्टरवर पेरणी झाली आहे.

आगाप मूग, मका, तूर, उडीद, सोयाबीन, भुईमूग यांसह अन्‍य पिके वाढीच्या अवस्थेत आहेत. मका पिकाचे सरासरी क्षेत्र ४०,७५३ हेक्टर असून ४४,९०७ हेक्टरवर म्हणजे ११० टक्के पेरणी झाली आहे. आगाप पेरणी केलेल्या सोयाबीन पीक फुलोरा अवस्थेत आहे.

मका पिकावर अमेरिकन लष्करी अळीचा प्रादुर्भाव होऊ लागला आहे. मूग, उडीद पिकावर पाने खाण्याच्या अळींचा प्रादुर्भाव झाला आहे. याबाबत शेतकऱ्यांना कृषी विभागाने मार्गदर्शन सुरू केले आहे. यंदाच्या आडसाली हंगामातील ऊस लागवडीसाठी शेतकरी नियोजन करू लागला आहे.

येत्या आठवड्यापासून ऊस लागवडीस प्रारंभ केला जाणार आहे. जुलै महिन्यातील शनिवार (ता. १९) अखेर १११ मिलिमीटर पाऊस झाला आहे. या पावसामुळे बळीराजा सुखावला आहे. खरीप हंगामातील पेरा अंतिम टप्प्यात आला असून येत्या पंधरा ते वीस दिवसांत पेरणी पूर्ण होईल, अशी शक्यता कृषी विभागाने वर्तवली आहे.

तालुकानिहाय पेरणी दृष्टिक्षेप (क्षेत्र-हेक्टरमध्ये)

तालुका क्षेत्र

मिरज २१८८५

जत ७२३४६

खानापूर १४४९२

वाळवा २०९६०

तासगाव २८५०६

शिराळा १०७५०

कवठेमहांकाळ २१४४४

पलूस ५८०६

कडेगाव ९८२७

एकूण २२८१८९