Kolhapur News : दुष्काळी परिस्थितीमुळे ऊस रोपांची मागणी घटल्याने डबघाईला आलेल्‍या पश्‍चिम महाराष्ट्रातील ऊस रोपवाटिकांना कर्नाटकने आधार दिला आहे. मॉन्सूनपूर्व पाऊस चांगला झाल्याने कर्नाटकात मेच्या उत्तरार्धापासून उसाची लागवड अचानक वाढली. यामुळे रोपांच्या मागणीतही वाढ झाली. याचा सकारात्मक परिणाम रोपवाटिकांचे अर्थकारण सुधारण्यावर झाला आहे. प्रति रोपांमागे सरासरी ८० पैशांपर्यंत वाढ झाल्याने याचाही फायदा रोपवाटिका चालकांना होत आहे.

गेल्या वर्षी पावसाचे प्रमाण फार कमी राहिले. त्यामुळे उसाच्या लागवडी लांबल्या. स्थानिक मागणीसह राज्याच्या विविध भागांसह परराज्यांतील मागणी ठप्प झाली. त्यामुळे ऊस रोपवाटिकांतील तयार झालेली रोपे अक्षरशः जनावरांच्या चाऱ्यासाठी देण्यात आली. गुंतवणूक करून उभा केलेला रोपवाटिका व्यवसाय अनेकांना बंद करण्याची वेळ आली.

आर्थिक स्थिती बिकट होत असतानाच मेच्या मध्यापासून कर्नाटकमधून मागणी वाढू लागली याचा फायदा रोपवाटिका चालकांना होत आहे. अचानक मागणी वाढल्याने रोपांचा पुरवठा करताना दमछाक होत आहे. कर्नाटकात ०२६५ ऊस प्रजातींच्या रोपांना सर्वाधिक मागणी आहे. याबरोबरच मराठवाडा, विदर्भात ८६०३२, १०००१, १८१२१ या रोपांना मागणी आहे.

उगवण नसल्याने रोपे निर्मिती धीमी

मागणी आल्यानंतर रोपवाटिका चालकांनी रोप निर्मिती सुरू केली असली, तरी सध्याचे हवामान रोपांच्या उगवणीसाठी चांगले नसल्याचे रोपांची वाढ अत्यंत धीम्या प्रमाणात होत असल्याचे रोपवाटिका चालकांनी सांगितले. यामुळे रोपांसाठी ऊस मिळविण्‍यापासून ती वेळेत तयार करून देणे हे आव्हान ठरत आहे.

पश्‍चिम महाराष्ट्रातील ऊस रोपवाटिकांची शेतकऱ्यांबरोबर राज्याच्या अन्य भागांतील रोपवाटिका चालकांकडूनही मागणी आहे. ही मागणी मोठी आहे. अन्य भागातील रोपवाटिका पश्‍चिम महाराष्ट्रातील रोपवाटिकांकडून रोपे खरेदी करून ती स्थानिक ठिकाणी उपलब्ध करून देत असल्याचे रोपवाटिका चालकांनी सांगितले.

पावसावर मागणी निर्भर

पश्‍चिम महाराष्ट्रातील ऊस पट्ट्यात पुरेसा पाऊस नसल्याचे आडसाली लागवडी धीम्या होत आहे. पुराचा धोका असल्याने अनेक शेतकरी सप्टेंबरपर्यंत लागवड करण्याच्या स्थितीत नाही. जरी पुरेसा पाऊस झाला तरी लागवडी वाढतील. मराठवाडा, विदर्भ, दक्षिण सोलापूर, कर्नाटक भागांतून बरोबरच गुजरातेतील कारखान्‍यांकडूनही मागणी वाढेल, असा आशावाद रोपवाटिका चालकांचा आहे.