Pune News: जुन्नर व परिसरातील गावांतून रविवारी (ता.१३) आणि सोमवारी (ता.१४) सलग दोन दिवस वादळी वारा, तसेच मेघगर्जनेसह गारांचा जोराचा पाऊस झाला. अचानक आलेल्या या अवकाळी पावसामुळे शेतातील कांदा व उन्हाळी भुईमूग पिकांचे मोठे नुकसान झाले आहे. महसूल विभागाने नुकसानीचे पंचनामे करावेत, तसेच शेतकऱ्यांना नुकसान भरपाई द्यावी, अशी परिसरातील शेतकऱ्यांची मागणी आहे.

जुन्नर, लेण्याद्री, गोळेगाव, अलदरे, पिंपळगाव सिद्धनाथ, कबाडवाडी, राजूर आदी भागांत पावसाचा जोर अधिक होता. सुमारे दोन तास झालेल्या पावसाने शेतात पाणी साचले होते. सध्या शेतात कांदा काढणीची कामे सुरू आहेत.

काढणीस आलेला कांदा व शेतात काढून ठेवलेल्या कांद्याचे, तसेच उन्हाळी भुईमूग पिकाचे अवकाळी पावसाने मोठे नुकसान झाल्याचे शेतकरी स्वप्नील दप्तरे यांनी सांगितले. अचानक आलेल्या पावसाने जुन्नरच्या आठवडे बाजारात विक्रेते, तसेच ग्राहकांची धावपळ उडाली. महसूल विभागाकडे मढ येथे २६ मिलिमीटर, तर जुन्नरला ७ मिलिमीटर पाऊस पडल्याची नोंद झाली आहे.

मुळशी तालुक्यात मुठा खोऱ्यात रविवारी (ता. १३) सायंकाळी ६ वाजल्यापासून जोरदार वादळी वाऱ्यासह गारपिटीचा पाऊस झाला. त्यामुळे शेतातील उभी पिके व आंब्याचे मोठे नुकसान झाले. तर आटाळवाडीत ७ विजेचे खांब पडले असून, वीजपुरवठा खंडित झाला आहे. रविवारी दुपारपर्यंत मुठा खोऱ्यात मध्यम पाऊस झाला होता.

सायंकाळी ६ वाजल्यानंतर जोरदार वारे वाहू लागले. तसेच मोठ्या गारांचा पाऊस सुरू झाला. त्यामुळे शेतकरी वर्गाची चांगलीच तारांबळ उडाली. अनेक शेतकरी कांदा काढणी करत होते. त्यांना कांदा झाकून ठेवणे, वाहून नेण्यासाठी धावपळ करावी लागली. काही शेतकऱ्यांचा काढलेला कांदा, वाल, मसूर, हरभरा भिजल्याने नुकसान झाले.