Chhatrapati Sambhajinagar News: राज्यात सिंचन योजनांची प्रगणना १ मार्चपासून सुरू होणार आहे. त्यासाठी राज्यातील सर्व जिल्हा जलसंधारण अधिकाऱ्यांचे प्रशिक्षण जल व भूमी व्यवस्थापन संस्था (वाल्मी) येथे नुकतेच पार पडले.

केंद्र शासनाकडून नव्याने सुरू होणाऱ्या लघू सिंचन योजनांची ७ वी प्रगणना व जलसाठा योजनांची दुसरी व मोठ्या; मध्यम प्रकल्पांच्या पहिल्या प्रगणनेसाठी हे राज्यस्तरीय प्रशिक्षण घेण्यात आले. राज्य प्रगणना आयुक्त तथा आयुक्त मृदा व जलसंधारण विभाग प्रकाश खपले यांच्या अध्यक्षतेखाली हे प्रशिक्षण पार पडले. या प्रशिक्षणात राज्यातील मृदा व जलसंधारण विभाग व जलसंपदा विभागाचे वरिष्ठ अधिकारी उपस्थित होते.

जलशक्ती मंत्रालयातील वरिष्ठ अधिकारी श्रीमती प्रियंका कुलश्रेष्ठा व अजय बक्षी यांनी उपस्थितांना दूरदृश्‍यप्रणालीद्वारे मार्गदर्शन केले. प्रादेशिक जलसंधारण अधिकारी हरिभाऊ गिते, दिलीप निपाणे, सहसंचालक श्रीमती मृणालिनी भूत यांनी उपस्थितांना मार्गदर्शन केले.

या प्रगणनेमध्ये राज्यातील सर्व लघू सिंचन योजनांची जलसाठ्याची व मध्यम मोठ्या प्रकल्पाची तसेच झऱ्यांची मोबाइल ॲप व वेब पोर्टलद्वारे प्रगणना होणार आहे. प्रशिक्षणाच्या आयोजनासाठी अप्पर आयुक्त तथा नोडल अधिकारी (प्रगणना) नितीन दुसाने मृदा व जलसंधारण विभाग यांच्या मार्गदर्शनाखाली सांख्यिकी कक्षातील अधिकारी व कर्मचारी तसेच आयुक्त कार्यालयातील सर्व अधिकारी, कर्मचारी यांनी परिश्रम घेतले.

...याविषयी झाले प्रशिक्षण

निर्मित सिंचन क्षमता व पाण्याचा वापर याबाबतची निश्‍चित माहिती गोळा करणे.

दीर्घकालीन व अल्पकालीन सिंचन योजनांच्या आखणीसाठी नियोजन करणे.

भूजल पाणीसाठ्याच्या उपलब्धतेबाबत अंदाज वर्तविणे.

जल योजनांबाबत भविष्यात धोरण निश्‍चित करणे.