Nashik Paddy : आदिवासी विकास महामंडळाच्या धान खरेदीचे गुजरात कनेक्शन उघड झाल्यावर महामंडळाने सोमवारी (ता. ५) पांढुर्ली येथील रेणुका राईस मिलची चौकशी केली. तसेच, या राईस मिलच्या संचालकांनी आदिवासी विकास विभाग व नाशिकच्या जिल्हाधिकारी कार्यालयास आपला खुलासाही सादर केला आहे.

आदिवासी विकास महामंडळाचे ट्रक गुजरातला धान देत असल्याचा प्रकार काही दिवसांपूर्वी ‘सकाळ’ने उघडकीस आणला. या प्रकरणी या विभागाने चौकशी समिती नियुक्त केली. त्यांनी सुरगाणा येथून पाहणी करीत गुजरात कनेक्शनची कागदपत्रे व गाड्यांची माहिती जाणून घेतली. दरम्यान, सोमवारी चौकशी समितीने रेणुका राईस मिलला भेट देत तेथील गुदामाची पाहणी केली.

दरम्यान, राईस मिलच्या संचालकांनी सोमवारी खुलासाही सादर केला आहे. त्यानुसार २८ एप्रिलला सुरगाणा तालुक्यातील बाऱ्हे येथील तीन वाहने (एमएच १५ एफव्ही ५०३३, एमएच १७ बीवाय ३३१७ व एमटीएस ५७९) राईस मिलमध्ये खाली झाली आहेत.

एक हजार १५० कट्टे या ठिकाणी ठेवण्यात आले. त्याची पडताळणीही समितीने केली. या प्रकरणी आपला संबंध नसल्याचे रेणुका राईस मिलच्या संचालकांनी खुलाशात म्हटले आहे. त्यामुळे चौकशी समिती आता काय अहवाल देते, याकडे लक्ष लागून आहे.