Pune News: पुणे बाजार समितीचे संचालक मंडळ बरखास्त करून सर्व संचालकांची ‘ईडी’ व इन्कम टॅक्स विभागामार्फत स्वतंत्र चौकशी करण्यात यावी. तसेच दोषींवर फौजदारी गुन्हे दाखल करा, अन्यथा राष्ट्रवादी कॉंग्रेस (शरदचंद्र पवार) पक्ष न्यायालयात धाव घेणार असल्याची माहिती प्रदेश प्रवक्ता विकास लवांडे यांनी पत्रकार परिषदेत दिली.

पुणे पत्रकार भवन येथे बुधवारी (ता. ९) श्री. लवांडे यांनी पत्रकार परिषद घेतली. या वेळी राष्ट्रवादी काँग्रेस (शरदचंद्र पवार) पक्षाचे संघटक विक्रांत पाटील हे उपस्थित होते. श्री. लवांडे म्हणाले की, संचालक आल्यापासून बाजार समितीत टेंडर, सेस घोटाळा, मोशी बाजारातील दिलेले गाळे, सुरक्षा रक्षक नियुक्तीमध्ये झालेला घोटाळा, डमी व्यापाऱ्यांच्या माध्यमातून होत असलेली शेतकऱ्यांची पिळवणूक, बेकायदा पद्धतीने पार्किंग वाटप, टपऱ्या उभारणे, आडतदारांचे दप्तर तपासणी, ५५ जागेवरील अनधिकृत वसुली, फुलबाजार घोटाळा यासह विविध गैरकारभार आणि भ्रष्टाचार झाले आहे.

पालकमंत्री अजित पवार यांना सकाळी उठून प्रत्येक काम पाहण्याची व गुणवत्ता तपासण्याची सवय आहे. चांगली सवय आहे, परंतु त्यांनी पुणे बाजार समितीत पहाटे येऊन सर्व बाजाराची पाहणी करावी. त्यावेळी आम्हालाही बोलविण्यात यावे. त्यानंतर दोषींवर सक्त कारवाई करावी, अशी मागणी श्री. लवांडे यांनी केली. बाजार समितीतील गैरकारभार आणि घोटाळ्याबद्दल मी आणि तालुक्यातील शेतकऱ्यांनी ज्येष्ठ नेते शरद पवार यांची भेट घेऊन सर्व माहिती दिली आहे. यावर त्यांनी एकत्रित बैठक घेण्याचा प्रयत्न करू, असे आश्वासन दिल्याचे श्री. लवांडे यांनी सांगितले.

चौकशी समितीच्या अध्यक्षांवर आक्षेप

पुणे जिल्हा ग्रामीणचे उपनिबंधक प्रकाश जगताप यांचे संचालक मंडळाशी हितसंबध आहेत. त्यांनीच संचालक मंडळाला अभय दिले आहे. या आधी संचालकांनी काही वेळा त्यांना चौकशीचे आदेश दिले होते. परंतु त्यांनी कोणतीही चौकशी केली नसल्याचा आरोप करून श्री. लवांडे यांनी चौकशी समितीचे अध्यक्ष बदलण्याची मागणी केली.