Solapur News : ‘‘आत्महत्याग्रस्त शेतकरी आणि शेतमजूर मुलींच्या विवाहासाठी सोलापुरातील एसपी प्रतिष्ठानने पुढाकार घेतला आहे. या मुलींच्या विवाहासाठी येत्या २५ डिसेंबरला सामुदायिक विवाह सोहळ्याचे आयोजन करण्यात आले आहे,’’ अशी माहिती एसपी प्रतिष्ठानचे संस्थापक समीर पांडगळे यांनी दिली.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

श्री. पांडगळे म्हणाले, ‘‘ग्रामीण भागात अनेक गावांत शेतकरी, शेतमजूर आर्थिकदृष्ट्या परिस्थिती नसतानाही मुलींचा विवाह करण्यासाठी कर्ज काढून विवाह करतात. पुढे जाऊन कर्ज फेडण्यासाठी बऱ्याच अडचणी येतात.

एकीकडे कुटुंबांचा खर्च आणि कर्जाची परिस्थिती, त्यामुळे शेतकरी, शेतमजूर आत्महत्येला बळी पडतात, अशा या कुटुंबांना सावरण्यासाठी आम्ही प्रयत्न करीत आहोत. पण अशा शेतकऱ्यांच्या मुलींच्या विवाहासाठी विवाहसोहळ्याचे आयोजनही केले आहे.’’

वधू-वरांना मणिमंगळसूत्र, संसारोपयोगी साहित्य

‘‘आमच्या प्रतिष्ठानच्या वतीने सामुदायिक विवाह सोहळ्याचे यंदाचे सहावे वर्ष आहे. भवानी पेठेतील मड्डी वस्तीत सारनाथ बुद्ध विहारच्या मैदानात २५ डिसेंबरला हा सोहळा होईल. सर्व जाती-धर्मांसाठी आणि दिव्यांगांसाठीही यात प्रवेश असेल.

या सोहळ्यात वधू-वरांना संपूर्ण पोशाख, मणिमंगळसूत्र, जोडवे, यासह संसारोपयोगी साहित्य आणि वऱ्हाडी मंडळीसाठी स्नेहभोजनाची व्यवस्था करण्यात येईल. या विवाहाच्या नोंदणीसाठी ९६६५५७१७११ या मोबाइलवर संपर्क साधावा,’’ असे आवाहन पांडगळे यांनी केले.