Kolhapur News : शिरोळ तालुक्यात हुमणी अळीचा प्रादुर्भाव शेतकऱ्यांसाठी डोकेदुखी बनली आहे. उसाबरोबर अन्य पिकांना धोका निर्माण झाला असून मशागतीची कामे करून पेरणीसाठी पावसाकडे लक्ष लागले असताना ‘हुमणी’च्या प्रादुर्भावाचे नवे संकट शेतकऱ्यांसमोर उभे राहिले आहे.

शिरोळ तालुक्यात अवकाळी पावसानंतर हुमणीचा प्रादुर्भाव जाणवू लागला आहे. उभी पिके वाचवण्याबरोबरच नव्याने पेरणी करण्याआधी हुमणीचे संकटावर नियंत्रण ठेवण्याची गरज आहे. यासाठी तालुका कृषी विभागामार्फत हुमणी नियंत्रणासाठी शेतकऱ्यांना मार्गदर्शनाची गरज निर्माण झाली आहे. सध्या शेतकऱ्यांनी शेतात सऱ्या सोडल्या असून शेत पेरणीसाठी तयार केले आहे.

अशातच शिरोळ तालुक्यात पेरणीच्या तोंडावर हुमणीचा प्रादुर्भाव होत आहे. दरवर्षी अवकाळी पाऊस पडल्यानंतर हुमणीचे भुंगेरे जमिनीतून बाहेर पडतात. प्रकाश सापळ्याचा वापर हा या किडीवर अतिशय रामबाण व प्रतिकात्मक उपाय आहे.

भुंगेरे एकत्रित पकडून नष्ट केल्यास जमिनीची अंडी पडणार नाहीत आणि हुमणी अळीचा जन्म होणार नाही, असे कृषी विभागाकडून सांगण्यात येत आहे. कृषी विभागाकडून ठिकठिकाणी शेतकऱ्यांना हुमणी नष्ट करण्यासाठी प्रात्यक्षिके दाखविण्यात येत आहेत.