Buldhana News : गेल्या महिन्यात झालेल्या मॉन्सूनोत्तर पावसाने या तालुक्यात कपाशी, तूर, हरभरा, गहू या रब्बी पिकांचे अतोनात नुकसान झाले. तालुक्यातील अनेक शेतकऱ्यांनी रब्बीत लागवड केलेल्या हरभरा पिकावर ट्रॅक्टर फिरवल्याचे विदारक चित्र आहे. या शेतकऱ्यांवर दुबार पेरणीचे संकट आहे.

साधारणतः दिवाळीच्या मुहूर्तावर रब्बीचा हंगाम सुरू झाला होता. सोयाबीन तयार झाल्यावर शेतकऱ्यांनी गहू, हरभरा या रब्बी पिकांच्या लागवडीची तयारी सुरू केली होती. गेल्या महिन्यातील शेवटच्या आठवड्यात पावसाने या तालुक्यात धुमाकूळ घातला.

त्यामुळे कापूस, तूर, या खरीप पिकांचे नुकसान झाले. हजारो क्विंटल कापूस शेतात भिजला. व्यापारी या भिजलेल्या कापसाला अत्‍यंत कमी भावात खरेदी करीत आहेत. तूर पिकाचे पण नुकसान झाले. तुरीच्या शेंगा गळून पडल्या. शेतात आता केवळ तुराट्या उभ्या आहेत. पावसाची संक्रांत आल्याने शेतकरी पार उद्‍ध्वस्त झाला आहे. पावसानंतर ओलाव्यामुळे मर रोगाचे प्रमाण वाढले. तालुक्यात शेकडो शेतकऱ्यांनी हरभरा पिकावर रोटाव्हेटर फिरविले आहे.

मी माझ्या तीन एकरात हरभरा पेरणी केली होती. पण पावसामुळे हरभरा पिकावर मर रोगाचे आक्रमण झाल्‍याने अंकुरलेल्या हरभरा रोपावर किडीचा प्रादुर्भाव झाला. त्‍यामुळे हरभरा पिकावर ट्रॅक्टर फिरवण्याशिवाय पर्याय नव्हता. दुबार पेरणीचे संकट ओढावले आहे.- श्रीकृष्ण राऊत, तामगाव, जि. बुलडाणा