Nagpur News : हिंदी भाषिकांच्या श्रावणाला सुरुवात होताच अंडी दरात घसरण नोंदविण्यात आली. करीमनगर (तेलंगणा) बाजारात अंड्याचे दर ४०५ रुपये शेकड्यावर आल्यानंतर त्याचा फायदा घेत व्यापाऱ्यांनी कमी दरात अंडी खरेदी केली.

कोल्डस्टोरेजमध्ये याची साठवणूक करून आता तीच अंडी जादा दराने विक्री करण्यात येणार आहेत. या व्यवहारात मात्र लेअर पोल्ट्रीधारकांना नुकसान सोसावे लागत असल्याचा आरोप होत आहे. दरम्यान अंडी दरात सुधारणा होऊन सोमवारी (ता. २९) दर ४४० रुपये शेकडावर पोहोचले.

महाराष्ट्राची रोजची अंडी मागणी ही एक कोटी नग आहे. राज्यातील पोल्ट्री व्यावसायिकांच्या माध्यमातून त्याची पूर्तता शक्‍य होत नाही. त्यामुळे आंध्र प्रदेश, तेलंगणा या राज्यांतूनही अंडी महाराष्ट्रात आयात होतात.

तेथील राज्य सरकारने पोल्ट्रीसाठी काही सवलती दिल्या आहेत. त्यामुळे त्यांना कमी दरात अंडी विकणे शक्‍य होते. महाराष्ट्रात मात्र अशा कोणत्याच सवलती पोल्ट्री क्षेत्रासाठी नाहीत, परिणामी या भागात अंडी उत्पादकता खर्च प्रतिनग साडेचार रुपये आहे.

सध्या हिंदी भाषिकांचा श्रावण सुरू झाल्यानंतर अंडी मागणीत घट नोंदविली गेली. परिणामी ४०५ ते ४१० रुपये शेकडापर्यंत दर घसरले. त्यामुळे उत्पादकता खर्चाची भरपाई देखील शक्‍य होत नसल्याची स्थिती आहे.

तेलंगणातील करीमनगर भागात अंडी दर ४०५ रुपयांवर आले. ही संधी साधत व्यापाऱ्यांनी नफेखोरीच्या उद्देशातून त्याची खरेदी केली. कमी दरात खरेदी केलेल्या अंड्यांची साठवणूक करून दर वाढताच त्याची विक्री केली जाणार आहे.

त्याच प्रयत्नांअंतर्गत आता दर ४०५ ते ४१० रुपयांवरून वाढत सोमवारी (ता. २९) ते ४४० रुपयांवर पोहोचले. राज्यातील काही लेअर पोल्ट्री व्यावसायिकांनी यापूर्वीचे सौदे ४२० रुपयांनी केले आहेत.

त्यामुळे त्यांना लाखो रुपयांचे नुकसान सोसावे लागले. विशेष म्हणजे पंधरवड्यापूर्वी अंडी दर सध्याच्या ४०० रुपयांवरून ५२० रुपयांवर गेला होता. आता दरातील घसरणीमुळे लेअर पोल्ट्री व्यावसायिकानी चिंता वाढली आहे.

करीमनगर (तेलंगणा) भागात अंडी दर शेकडा ४०० ते ४०५ रुपयांवर आले होते. दर कोसळताच मोठ्या प्रमाणावर खरेदी करून त्याची साठवणूक कोल्डस्टोरेजमध्ये केली जाते. अंड्यांची टिकवण क्षमता अधिक आहे.

त्यानंतर तेजी आणत ही कमी दरात खरेदी केलेली अंडी विकून नफा कमविण्यावर व्यापारी भर देतात. त्यामुळे लेअर पोल्ट्री व्यावसायिकांना मोठे नुकसान सोसावे लागते. अशा प्रकारांना पायबंद बसावा, याकरिता शासन पातळीवरून यंत्रणा उभारण्याची गरज आहे.

- रवींद्र मेटकर, पोल्ट्री व्यावसायिक, अमरावती