Dhule News : उप्परपिंड (ता. शिरपूर) येथील तापी नदीवरील वाळू डेपो सुरू असून, ठेकेदाराने चक्क आक्कडसे (ता. शिंदखेडा) येथील तापी नदीपात्रातून अवैध उत्खनन करून अतिक्रमण केले आहे.

शिंदखेड्याचे तहसीलदार अनिल गवांदे यांनी गस्तीपथक नियुक्ती केले. मात्र, गस्तीपथक कारवाई करण्यात कूचकामी ठरत असल्याने त्यांच्या कामावरच प्रश्‍नचिन्ह उपस्थित केले जात आहे.

तापी नदीवरील उप्परपिंड येथे शासनाने वाळू घाट दिले आहे. वाळू घाट ठेकेदारांनी आक्कडसे येथील तापी नदीपात्रात अतिक्रमण करून दिवस-रात्र वाळू उत्खनन करीत असल्याबाबत ग्रामस्थांनी तहसीलदार अनिल गवांदे यांच्याकडे तक्रारी केल्यानंतर आठवडाभर सकाळी सहा ते सायंकाळी सहापर्यंत गस्ती पथकात प्रत्येक दिवसाला एक ग्राम महसूल अधिकारी (तलाठी) व एक महसूल सेवक (कोतवाल) यांची नियुक्ती करण्यात आली आहे.

गस्ती पथक हे नदीपात्रात सकाळी येवून एक सेल्फी फोटो काढून गायब होत असल्याचे ग्रामस्थांचे म्हणणे आहे. गस्ती पथक हे वर्शी महसूल मंडल अधिकारी मोनिका धनगर यांच्या देखरेखीखाली कामकाज करीत आहे.

गस्तीपथकातील अधिकारी, कर्मचारी

सोमवारी : धनंजय महाजन व विकास सैंदाणे (वरसूस), मंगळवारी : किशोर जगताप (दसवेल) व कैलास बोरसे (दत्ताणे), बुधवारी : भूपेश कोळी (भडणे) व महेश परदेशी (दत्ताणे), गुरूवारी : सागर गोमासे (तावखेडा, प्र. बेटावद) व समीशा पवार (चिरणे), शुक्रवारी : रजीअली सय्यद व राजेंद्र बोरसे (पाटण), शनिवार : अनिशा आगरकर व संदीप पाटील(वरूळ) व रविवार : संतोष कोरे (सुकवद) व जया आव्हाड (परसामळ) यांची नियुक्ती करण्यात आली आहे.