Parbhani News : पोहे टाकळी (ता. पाथरी) ग्रामपंचायतीच्या हद्दीतील गोदामात तीन वेगवेगळ्या कंपन्यांच्या संशयास्पद खतांची विक्री करून शेतकऱ्यांची फसवणूक करण्याच्या उद्देशाने अवैध खतसाठा बाळगलेला आढळून आला.

या प्रकरणी गोविंद पवार (रा. आनंदनगर, ता. पाथरी) याच्या विरुद्ध पाथरीचे तालुका कृषी अधिकारी तथा खत निरीक्षक गोविंद कोल्हे यांनी दिलेल्या फिर्यादीवरून पाथरी पोलीस ठाण्यात मंगळवारी (ता. १७) गुन्हा नोंद झाला आहे.

पाथरी ते मानवत रस्त्यावरील पोहे टाकळी (ता. पाथरी) शिवारातील गोदामातून संशयास्पद अनाधिकृत खतसाठा करून विक्री केली जात असल्याची माहिती मिळाल्यावर कृषी विभागाच्या गुण नियंत्रण पथकाने रविवारी (ता. १५) दुपारी गोदामाला सिल ठोकले.

सोमवारी (ता.१६) सकाळी खत निरीक्षक तथा तालुका कृषी अधिकारी गोविंद कोल्हे, लातूर येथील कृषी सहसंचालक कार्यालयातील तंत्राधिकारी तथा विभागीय गुणनियंत्रक बाबूराव मुंढे, जिल्हा कृषी विकास अधिकारी गोविंद दहिवडे, जिल्हा गुणनियंत्रक गोविंद काळे, पोलीस निरीक्षक एस. आर. साठे यांनी गोदामाची झडती घेतली असता. तीन वेगवेगळ्या कंपन्यांच्या विविध ग्रेडच्या खतांच्या ३१५ पिशव्या आढळून आल्या.

त्याची किंमत २ लाख ४० हजार २०० रुपये होते. या सर्व खतांचे नमुने खत परीक्षण प्रयोगशाळेत विश्लेषणाकरिता पाठविण्यात आले. अवैध साठणुकीद्वारे गोविंद पवार (रा. आनंद नगर, ता. पाथरी) याने खत उत्पादन विक्री व साठणुकीचा परवाना न घेता खतसदृश वस्तू (खत) संशयास्पदरित्या व अनधिकृतरित्या शेतकऱ्यांना विक्री व वितरण करून फसवणूक करण्याच्या उद्देशाने खतसाठा बाळगेलला आढळून आला. या प्रकरणी गोविंद पवार याच्या विरुद्ध खत नियंत्रण आदेशानुसार दिलेल्या फिर्यादीवरून गुन्हा नोंद झाला.