Solapur News : शेतमाल विक्री झाल्यानंतर शेतकऱ्यांकडून बेकायदेशीर दोन टक्के अडत वसूल केल्याच्या प्रकरणाचा खुलासा बाजार समिती प्रशासनाला प्राप्त झाला आहे. चुकून दुसऱ्या शेतकऱ्याची उचल पावतीवर लागल्याचा दावा अडत्याने खुलाशात केला आहे. आणि हाच खुलासा प्रशासनाने मान्य करत प्रकरण संपवण्याचा प्रयत्न सुरू केला आहे.

मंद्रूप येथील एका शेतकऱ्याने बारा एप्रिल रोजी सोलापूर कृषी उत्पन्न बाजार समितीमध्ये कलिंगडे विक्रीसाठी आणली होती. विक्रीनंतर शेतकऱ्याकडून पावतीवर दोन टक्के आडत कपात करण्यात आली. यानंतर या शेतकऱ्याने बाजार समितीकडे लेखी तक्रार दाखल केली. या तक्रारीनंतर बाजार समिती प्रशासनाने संबंधित अडत्याला नोटीस बजावली होती.

पहिल्या नोटिशीला संबंधित अडत्याने उत्तर दिले नाही. अंतिम व दुसऱ्या नोटिशीनंतर अडत्याने तक्रारदार शेतकऱ्यांच्या पावतीवर झालेली कपात ही दुसऱ्या शेतकऱ्याची असून नजरचुकीने तक्रारदार शेतकऱ्यांच्या पावतीवर नमूद करण्यात आली असल्याचा दावा केला. आणि त्यांच्या या खुलाशानंतर बाजार समिती प्रशासनाने अद्याप या प्रकरणात कुठलीच कारवाई केली नाही.

बाजार समितीमध्ये शेतकऱ्याकडून सर्रास दोन टक्के अडत वसूल केली जाते. त्याचबरोबर कॅरेट भाडे व इतर बाबींच्या नावावरही मोठ्या प्रमाणात बेकायदेशीर रक्कम वसूल केली जाते. हा सारा प्रकार बाजार समिती प्रशासनाच्या आशीर्वादाने चालतो. तक्रार दाखल झाल्यानंतर संबंधित अडत्याची पावती पुस्तक तपासल्यास सर्व शेतकऱ्यांकडून अडत वसूल केली जात असल्याचे दिसून आले असते.

मात्र प्रशासनाचे अधिकारी, असे काही आढळून आले नसल्याचा दावा करत आहेत. याबाबत पडताळणी केली असता बाजार समिती प्रशासनाचे अधिकारी खोटी माहिती पुरवून संबंधित अडत्याला वाचवत असल्याचा दावा केला जात आहे. या प्रकरणात तत्कालीन प्रशासक प्रगती बागल यांनीही कुठलीही ठोस कारवाई केल्याचे दिसून आले नाही. यामुळे इतर प्रकरणाप्रमाणे हेही प्रकरण कारवाईविना बंद होण्याची शक्यता आहे.