Mahur News : निम्न पैनगंगा प्रकल्पात आंदोलनाची धग कायम असताना नांदेड आणि यवतमाळ जिल्हा प्रशासनाकडून अधिसूचनांचा भडिमार केला जात आहे. बुडीत क्षेत्रातील आंदोलक शेतकऱ्यांच्या न्यायिक मागण्यांकडे दुर्लक्ष करून विदर्भ पाटबंधारे विकास महामंडळाने प्रकल्पाचे कार्यरंभ आदेश काढल्याने शेतकऱ्यांमध्ये तीव्र असंतोष खदखदत आहे.

निम्न पैनगंगा प्रकल्प चिमटा धरणात पहिल्या टप्प्यात नांदेड जिल्ह्यातील माहूर, किनवट आणि यवतमाळ जिल्ह्यातील आर्णी, घाटंजी तालुक्यातील एकूण १८ गावे बुडीत क्षेत्रात समाविष्ट करण्यात आली आहेत. यातील बहुतांश गावे ही पेसा अंतर्गत असून अधिकांश ग्रामपंचायत प्रकल्पाच्या विरोधात ग्रामसभेचे ठराव पारित केलेले आहेत.

स्थानिक दलाल मंडळीच्या मदतीने प्रशासनाने विशेष ग्रामसभेचे आयोजन करून राजकीय पुढाऱ्यांना शोभेल इतक्या मोठ्या प्रमाणात आश्वासनाची खैरात वाटत बुडीत क्षेत्रातील शेतकऱ्यांना हातावर चंद्र दाखविले होते.

प्रशासनाच्या भूलथापांना बळी जाऊन खंबाळा वासियांनी धरणाला समर्थन दिल्यामुळे प्रशासनस्तरावरून मोठ्या हालचाली होऊन भूसंपादन, पुनर्वसनाची अधिसूचना काढण्यात आल्या तर दोन दिवसांपूर्वी विदर्भ पाटबंधारे विकास महामंडळाच्या मुख्य अभियंता यांनी प्रकल्पाचे कार्यारंभ आदेश कंत्राटदार कंपनीला सुपूर्द केले. शेतकऱ्यांच्या समस्या, मागण्या जैसे थे असून त्यावर कुठलाही सकारात्मक तोडगा न काढता प्रशासनाने वर्क ऑर्डर काढण्याची कृती केल्याने शेतकऱ्यांमध्ये असंतोष निर्माण झाला आहे.