Amravati News : खरीप हंगामात अनधिकृत बियाणे विक्री, लिंकींगचे प्रकार सर्रास घडतात. त्यासोबतच नजीकच्या काळात एचटीबिटी विक्रीआड देखील शेतकऱ्यांच्या फसवणुकीत वाढ झाली आहे. त्याची दखल घेत संबंधितांविरोधात गुन्हा दाखल करून त्याचे परवाने रद्द करावे, अशी मागणी आमदार प्रतिभा धानोरकर यांनी कृषिमंत्री अब्दुल सत्तार यांच्याकडे केली आहे.

गुरुवारी (ता.२९) त्यांनी या संदर्भाने मुख्यमंत्री एकनाथ शिंदे, कृषिमंत्री अब्दुल सत्तार यांना पत्र पाठवित ही मागणी केली. पत्रानुसार, गेल्या काही वर्षात वातावरणातील बदलाच्या परिणामी पाऊस कधी धो-धो बरसतो, तर कधी मोठा खंड पडतो.

त्यामुळे उत्पादकता प्रभावीत झाली आहे. उत्पन्नावरही याचा परिणाम दिसून येत आहे. अशातच अनधिकृत किंवा बोगस निविष्ठांचा बाजारात शिरकाव होत.

त्याची विक्री झाल्यास शेतकऱ्यांचा पूर्ण हंगाम नासतो. दुबार पेरणीकरिता पैशाची सोय करताना त्यांची चांगलीच दमछाक होते. त्यांना सावकारांकडून अधिक दराने पैसा आणावा लागतो. ही बाब लक्षात घेता अशा प्रकारांवर नियंत्रणासाठी तत्काळ पावले उचलण्यात यावी आणि संबंधितांविरोधात कारवाई करावी, अशी मागणी करण्यात आली आहे.